Rahul amakba anema Tamil Nadu Congress-i longkak ait

Chennai, August 05 (Agencies): Gujarat nung Congress tatong Tir, Rahul Gandhi amenba gari densema pa indang convoy amakba anema Honibarnü Tamil Nadu Congress unit tongti, Thirunavukkarasar leniba nung party-i longkak aita Chennai yimti anasa Valluvar Kottam nung gari lenmang mokdanga liasü.
Longkak aitertemi gari lenmang mokdanga mener longkak aita Rahul Gandhi amakba nung aibelenertem aputsüla ta akhangba agüja yimyim ayim.
Congress-isa iba tatalokba atema Gujarat sorkar-a aitsü.
Ajisüaka tesülen police-i Thirunavukkarasar densema longkak aitertem pua kiyimba hall ka nung pudena ayu, saka tesülen chiok.
Iba denji kasa Kanyakumari district kübok Nagecoil densema tesem aika nung Congress züngsemtemi longkak ait.
Tanü Rahul Gandhi-i, Banaskantha district kübok Dhanera jila nung pa indang convoy amakbaji BJP aser RSS züngsemtemi lir, ta aitsüogo.
Yashi Gandhi-i Gujarat nung tzümetsüng agi kongshiba tesemtem semdangba anema BJP pusemertemi pa indang gari nung longru agi aon aser pa dang wako tanak sayua liasü. Ibaji ajanga pai lokti den onük tongmelang agi dang jembiba sülen aritepa toktsür ao.
Iba tatalokba dak sendakba nung tanü nisung ka puogo.