Rahul ano shisatsü main, mapang nüngdaker: Sheila Dikshit

New Delhi, February 24 (Agencies): 2019 küm Lok Sabha election nung Ato kilonser, Narendra Modi den tongti tokteper sudaktsütsü atema Congress Party-i Rahul Gandhi shimtsü tebilemba aliba mapang ka nung tanü Congress lenir tain aser taoba mapang Delhi Chief Minister, Sheila Dikshit-i, party tatong Tir (Rahul) ano shisatsü junga main, aser ano mapang lir, ta ashi.
Uttar Pradesh assembly election atema Congress-i Samajwadi Party den loktepba ajanga UP Congress Chief Minister candidate, Sheila Dikshit-i lai election nung metokteptsü lemtet.
Congress-SP loktepba dak sentakba nung Dikshit-i, ”Timtem tilateri kar liasü, ajisüaka tangbo ibaji bentetogo. Akhilesh (SP lenir aser chief minister) ji ajak rongnung tematiba jenjang nung lir. Mayawati jenjang junga mali. UP nung lenir asutsü atema BJP nungi lenir mali. Mapang shia Ato kilonseri state semdanger, ajisüaka pa Chief Minister masütsü ta ajaki meteta lir,” ta laisa ashi.
Laisa, UP nung Muslim nunger aser Dalit nungeri SP-Congress teloktep pusemtsü imlar, ta metetdaktsü.
Dikshit-i, Rahul aser Akhilesh nati senteper nüboyimba ajanga UP nung voter tem anir arutettsü, ta ashi.
State aika nung Congress jenjang kechiba mejungi akumer? ta asüngdangba langzüdang lai, ”Yimtenren oshi kanga melenshiogo. Iba ama temelenshi mapang ka nung Congress-i jenjang yangutsü merangdar. Rahul ano shisatsü main, pa arishi küma main. Pa küm 40 tema dang. Pa nem ano mapang agüjang. Aluyimertem atema bilemja jembibabo Rahul dang lir,” ta ashi.
Rahul Gandhi nem mapang kobika agütsütsüla ta asüngdangba langzüdang lai, ”Pa lenmang talangka jajaogo. Pa ano Ato kilonser maküm, kechiyong iba maongkaji tesülen arutsü, pai pa teinyaktsü inyakdar,” ta ashi.