Rahul den tembar ayimtsü akok: Akhilesh

Lucknow, September 08 (Agencies):  Tanü Uttar Pradesh Chief Minister, Akhilesh Yadav-i Rahul Gandhi tenüngsanga, Rahul ji nisung tajung ka lir, aser ni pa den tembar ayimtsü akok, ta jembiba ajanga state nung party ana lonjemtsü südi ta aikati bilem.
Assembly election agitsü aliba state, Uttar Pradesh nung tang Congress tatong Tir, Rahul-i BJP aser Centre sorkar na taitsüdak lir, ajisüaka pai Akhilesh’er SP sorkarbo odiodia maitsür.
SP lenir Akhilesh-i, “Rahul ya nisung tajung ka lir aser tebur tajung ka lir. Pa UP nung mapang talangka mongra asenokia pa den tembar ayimtsü akok. Nisung tajung ana ajurura, iba nungji kechi tai ali,” ta Akhilesh-i ashi.
Iba denji mesüktepa tawa Rahul-ia, “Yangi lanur Chief Minister ya reprangdangang. Akhilesh ya nisung tajung, saka par sorkari mapa meinyker,”  ta jembia liasü.
July 29, 2016 nü Lucknow nung Congress nung inyakertem den jembidang Rahul-i, küm 27 nung UP nung terenlok mali aser party (Congress) tashi nung mali, ta jembia liasü.
Rahul den tembar akumtsü akok ta jembiba dak sentakba nung osangbenertemi ‘Samajwadi Party aser Congress Party na lokteptsü maongka lir asü’ ta asüngdangba langzüdang Akhilesh-i, “Iba nungji kechiba nenoki yimtenren reprangteter,” ta ashi.
SP lenir, Kiranmoy Nanda-ibo, UP election nung SP-i tangar den meloktepi kijai tokteptsü, ta shiogo.