Rahul Gandhi amenba tayimtsü tera agi metsükok; Pilot dak tai tongloktsür

New Delhi, Luroi/August 31 (Agencies): Taküm küm Rongchii/April ita Karnataka nung flight crew temi mapang shitak nung teinyaktsü tim meinyakba ajanga Rahul Gandhi indang chartered plane second ishikati dang metsükok, ta aviation regulator DGCA (Directorate General of Civil Aviation)-i bushitetba osang metetdaktsü.
Bushisüngdangba osang nung ajemdaker Directorate General of Civil Aviation-i ashiba agi, ‘institutional awareness’ abensa maliba ajanga tesüsa crew-i teinyaktsütem inyak.
April 26 nü 10-seater plane ka nung Congress tir, Rahul mener Delhi nungi Karnataka kübok aliba Hubbali tesemi aoba mapang tsüngsang mopung junga liakasa, aoksa dang tayimtsü külen tsütsü manga aluba ajanga mazüoktettsüsa kümadok. Congress teloki iba tatalokba ya nisung kari tasa atonga inyak ta ashir aser bushisüngdangtsü atema takhangba agütsü.
Rahul Gandhi dak alaka, iba atalokba mapang tayimtsü nung passenger pezü den pilot ana, cabin crew ka aser engineer ka densema liasü.
Ligare aviation ajanga amshiba private Falcon 2000 jet nung tamalenbo timtem kecha maliasü ta züngsem ana-i akümba DGCA committee-i agütsüba tapak 30 report nung shia lir.
“Master caution, tetezü ‘autopilot disengage’ sür second 15 sülen ang warning agütsüdang plane nung aliba crew yagi teinyaktsütem tenzüka inyaker,” ta report nung shia lir.
Iba amala warning ya pilot dangi cockpit ajanga red light aser audio warning ajanga second ishika tsüngda lendong nungi jenbutsü atema tekümdangtsü agütsür.
Tatalokba sülen Rahul Gandhi indang teyarir Kaushal Vidyarthi-i shiba pa den kelümi plane nung densema liasü, pai police aser Karnataka Director General of Police dangi complaint zülu. Civil aviation minister, Suresh Prabhu-i iba tatalokba bushisüngdangtsü atema tetuyuba agütsü.