Rahul Gandhi-i CAB anema noktaktsü nangzük

New Delhi, February 4 (Agencies): Congress-i Rajya Sabha nung Citizenship (Amendment) Bill anema noktaktsü ta Hombarnü Congress president Rahul Gandhi-i Northeast nungi telok balala asem dang nangzükogo,
Tanü Northeast nungi telok asem- Northeast Students Organisation (NESO), Krishak Mukti Sangram Samity (KMSS) aser shisahir Hiren Gohain-i aniba civil society telok asemi mapang balala nung Rahul den ajurutepa CAB tebilemtsü lemsatep.
“Onoki Rahul den ajurutepa onok tangatetba metetdaktsüogo. Iba bill yagi Assam Accord menentsür ta onoki pa dang ashi” ta NESO advisor Samujjal Bhattacharya-i ashi.
Northeast aser Assam nung lisopurtem indang oshi, sobaliba aser maitsü atema iba bill nung lendong keta lir, ta paisa ashi.
“Onoki Rahul dang Lok Sabha nung iba bill agizüka lir, saka Assam Accord menentsüba bill ya Rajya Sabha nung magizükdaktsütsüla. Iba mapa ajanga NRC maparen nunga tetsükdaktsü ajurutsü ta shiogo” ta Bhattacharya-isa shisem.
“Rahul-i onok dang Northeast nung lisopurtem indang oshi, sobaliba aser maitsü shinga nema meraksadaktsütsü ta nangzük” ta paisa ashi.
Hombarnü NESO-i New Delhi nung JDU aser TMC lennirtem den ajurutep. Parnokisa Samajwadi Party dena ajurutepa bill anema noktaktsü ayongzüktsü.
Akhil Gogoi-i aniba KMSS züngsemtem den Assam nungi shisashirtem telok kati Congress president Rahul den ajurutep aser idangji Congress aser UPA den yaritepertemi Rajya Sabha nung bill anema noktaktsü ta nangzük.
Shisashir Gohain-i Rahul Gandhi den ajurutepba sülen “Congress party-i Bill anema noktaktsü ta Rahul-i nangzükba nung temulung alemer” ta ashi.