Rahul Gandhi-i chopper ung Churachandpur atong

Guwahati, Aami/June 29 (Agencies): Police temi lendong ataloktsü tetsübo nung Bishnupur tesem nung soitba sülen Congress lenir Rahul Gandhi ya chopper ka nung mener Brehostibar nikongdang Manipur kübok Churachandpur tonga liasü.

Pa indang convoy nung lendong agütsütsü tsüboba agi police temi Imphal nungi kilometer 20 shi pilar Bishnupur nung Gandhi aser pa meina arurtem soita liasü.

Osang ajanga ashiba agi, state sorkari agütsüba chopper ka amshia Rahul Gandhi-i Churachandpur semdang. Iba helicopter nung pa meina police tanishir aser administration ketdangsürtem oa liasü.

Manipur nung hopta aika rongrongshirong aser azüdokshi tensa tamajungtiba ajurua aliba Churachandpur atongba sülen Gandhi-i relief camp tem semdanga tensa asadanga pei ki yutsür arua jenoka alirtem den sensaksem kaa liasü.

“Manipur nung kü adianu aser adianutsür ajak nungi timtem lemsatepba angatsü atema ni aru. Kin ajunga nungi nüburtemi pelashishia agizük. Sorkari ni soitba ya tia maka. Manipur nung taneptsü nüngdaker. Asenok asoshi tongtipangtibaji yimjung tesunep lir,” ta Gandhi-i tweet ka nung ashi.