Rahul Gandhi-i Congress tir menden toktsüogo

New Delhi, July 3 (Agencies): Indian National Congress president Rahul Gandhi-i Bodbarnü tir menden nungi anenogo.
Tanü Rahul-i shidi ka zülua lemsatepba nung 2019 Lok Sabha election nung tamakok anguba atema pai tebilemtsü abenba shia lir.
May 25 nü Rahul-i Congress Working Committee (CWC) dang pai tir menden toktsütsü saka party atema maneni mapa inyaktsü ta ashi.
Idangji CWC-i Rahul tebilemba magizük saka pai tir menden toktsütsüsa ta shiyonga aru.
“Party yanglushitsü atema telemtetba takangtem agitsüla aser 2019 nung tamakok anguba ya nisung aika ajanga lir. Ni party indang President ka tebilemtsü toktsür tangar dak tai tongloktsüra, ibaji temeten mapa masü” ta Rahul-i shidi nungsa shia lir.
Paisa party züngsemtem dang pa melenzüker ka shimtsü aser iba atema CWC dak tashi lir ta paisa shisem.
“Nisung kati asen party len anitsübaji kanga tongtipang, saka iba nisung ni shimtsübaji tim masü. Asen party ya putiotsü aser senmang tajung aliba party ka lir, kanga timtema aser akhümketa aruba party koba ni kanga akhümtsübur. Asen party ya India nung tera yanga lir aser party-i telemtetba tajung ka agitsü ta ni amanger” ta Rahul-isa ashi.
2019 Lok Sabha election atema mapa inyakba odang lemsatepdang “Ni kija ser Prime Minister, RSS aser tanga rejutem den toktep. Ni India meimba agi rara aser India tamendakdak kümzüka ayutsü atema rara. Mapang kar nungbo ni kü kija dang liasü aser iba atema ni kanga nüma atanger” ta Rahul-isa shidi nung shia lir.
Tanü Rahul-i tir menden toktsüba shidi magütsüdang Parliament House kima osangbenertem den jembi aser idangji ‘CWC-i pa melenzüker ka shimang’ ta ayongzük.
“Memenui party-i taruba tir shimtsüla. Ni iba maparen nung shilem kecha mali. Ni tir menden toktsüba shidi agütsüogo aser ni tir masü” ta Lok Sabha nungi aludang pai ashi. Iba mapang Rahul den tetsü aser Congress Parliamentary Party (CPP) chairperson Sonia Gandhi dena liasü.