Rahul Gandhi-i jembiba oji shingaia süoki ia magir: BJP

New Delhi, September 20 (Agencies): Congress tatong Tir Rahul Gandhi aija tanü BJP-i, Rahul ya Congress party indang ‘kinü tanur’ lir ta ashiba den külemi par party mesüra par parnok den teloktep party temi pa o ji süoki ia magir, iba yongji pa nem Party Tir menden magütsür, ta ashi.
Yashi Bihar nung nüboyim sentong nung jembidang Rahul-i, Modi’er sorkarji takartem pusemer sorkar lir, ta aija liasü.
“Pa ya Congress pur indang kinü tanur lir. Nüburtemi pa ya süoki ia magir. Congress-ia pa süoki ia magir, kechiyong parnoki pa Tir mekümdaktsü,” ta BJP secretary Shrikant Sharma-i ashi.
“Par teloktep party tem- JD(U) aser RJD-ia pa süoki ia magir. RJD tongti lenir Lalu Prasad-i par ‘kinü tanur’ Tejaswi Yadav ang iba rally (Rahul’er rally) nung adentsü yok,” ta BJP lenirisa ashi.
Assembly election agitsü aliba Bihar nung Congress nüboyim tenzüka yashi Rahul-i, Modi’er sorkarji suit asemba sorkar, ta aitsüba den külemi state nüburtem dang, NDA tashii arura parnok meyong ali samatsü aser taküm jenjang tamajungba akümtsü, ta shia liasü.
Rahul-isa, “Ato kilonser Modi-i mapang lakh ana, nisung shia account nung sen lakh 15 aser osettsüset jenjang ajemtsü nangzükogo. Itemji ataloker asü (?)” ta ashi.
“Modi ya o saloka jembir ka liasü aser maneni ibaji lir,” ta paisa ashi.
Lalu dang masü saka JD(U) lenir aser chief minister Nitish Kumar nata iba rally nung maden, ajisüaka party nung tanga lenirtembo denogo.