Rahul Gandhi-i Lakhimpur semdang

Lakhimpur, August 3: Brehostibarnü Assam kübok Lakhimpur tesem nung yimtsüng ka Congress tatong tir Rahul Gandhi-i semdangba noksa nung angur.

Amtola, August 3 (Agencies): Congress tatong tir Rahul Gandhi-i tanü tzümetsüng agi tamajungtiba kongshir aliba Assam kübok Lakhimpur district semdangogo.
Pa rong tila ka nung mener Ranganadi ayong adena or kinük nung aliba Amtola tesem semdangogo.
Ayong kanga moshia ayimba ajanga tzünokdang (embankment) pokdanger nisung aliba tesem aser alu aika raksatsüogo.
“Assam nung tzümetsüng aliba angashia nenok den ajuruteba nenok timtem angadangtsü asoshi ni tsüngtong aruogo,” ta Amtola nung aliba nüburtemi parnok tebilemtsütem lemsatepba sülen Gandhi-i ashi.
“Ni nenok nem teyari agütsüdaktsütsü asoshi nokdaktsü, koba nenok angutsü tim lir,” ta pai ashi.
Paisa ashiba agi, Congress nung züngsemtem dang tzümetsüng ajanga ki raksatsüba yanglushiba nung teyari agütsüba den külemi iba lendong ajanga kongshir aliba kibongtem nem teyari agütsütsü asoshi tetuyuba agütsüogo.
Ato Kilonser Narendra Modi-i Mongolbarnü teyari sen crore 2,350 northeast nung tzümetsüng agi kongshir aliba state tem ajak atema agütsüogo. Iba sen ya tzümetsüng dak sendakba nung tang jongdak nüngdak balala atema teyair agütsütsüba aser tarutsü atema maparen balala inyaktsüba atema lir. Assam atema crore 250 tangsa agütsütsü asoshi sangdongogo.
Congress lenir aser taoba Union minister Santosh Mohan Dev, yashi süogo aser pa nem aküm tetushi agütsütsü asoshi Gandhi-i tanü Silchar semdangogo.