Rahul Gandhi-i par party sendokogo: Giriraj Singh

New Delhi, Metsüremi 03 (Agencies): Tripura aser Nagaland Assembly elections nung Bharatiya Janata Party (BJP)-i junga inyaktetba osang sangdongba sülen tanü Union minister, Giriraj Singh-i Congress Party Tir, Rahul Gandhi aitsü.
BJP leniri, Rahul ya Tir süaka nendaka meinyaker aser kanga tongtibang mapang ka nung pai par party sendokogo, ta ashi.
Osangbener den jembidang Singh-i, “Pa (Rahul) ya lenir ka masü, ajisüaka maongka anguba dang lir. Pa ya Chubatsür kati aso,” ta ashi.
Paisa, iba ama kanga tongtibang mapang nungbo lenir shingaia party nung inyakertem toktsür maoer, ta ashi.
“Mapang ka nung pa anogo 56 tashi sama, tanüa pa oadokogo. Iba ama kanga tongtibang mapang ka nung lenir shingaia party nung inyakertem toktsür maoer. Pai anibelem maginer,” ta Singh-i ashi.
“Koba mapang nung jena aotsüar pai (Rahul Gandhi) meteta lir, ajisüaka Congress-i kangshia pa lenir kümdaktsü,” ta pai shisem.
BJP-i Meghalaya assembly election nung takok anguba mapang ka nung pai Congress lenir, Rahul Gandhi aitsüogo.
Tripura Assembly election nung Manik Sarkar-i aniba Left Front-i tamakok angu aser Nagaland nung BJP den teloktepi menden 60 nungi 26 nung takok ngua liasü.