Rahul Gandhi-i Rae Bareli nung takoksa angur kibongtem semdang

New Delhi, November 02 (Agencies): Brihostibarnü Congress lenir, Rahul Gandhi-i Gujarat assembly election atema nüboyim nungi khen anisüngzüka Congress constituency, Rae Bareli semdanga yashi thermal power plant ka apokba lendong nung asür kibongtem aser yirua alirtem semdang.
Yashi Uttar Pradesh kübok Raebareli nung aliba NTPC indang Unchahar Therman Power station nung broiler pipe ka apokba lendong nung nisung 26 asü aser nisung 100 dak tema yirua liasü.
Tanep Congress tatong Tir Rahul, Surat nungi tayimtsü ajanga aruba sülen Rae Bareli district hospital semdanga iba lendong nung yirua alirtem ajuru. Iba sülen pai lendong atalokba tesem nung Union Power Minister, RK Singh ajurua liasü.
Pai mangyimer kibongtem ajruba sülen twitter ajanga, “NTPC lendong nung yirua alirtem ngua ni kanga mepelar. Asür kibongtem nem senotsü teyari agutsütsüla aser sorkar mapa agütsütsüla, iba den külemi ketdangsertemi yirua alirtem tajungtiba agi anepalutsüla,” ta ashi.
“Mapa inyakertemi ashiba agi, zübazülemba ajanga iba lendong atalok. Parnoki judicial ajanga bushisüngdangtsü aser aibelener nem tapet temerenshi agütsütsü atema takhangba agütsüogo,” ta Rahul-isa metetdaktsü.
Yashi iba lendong atalokli Rahul-i twitter ajanga, “Rae Bareli nung NTPC plant attalokba ajanga ni mepelar. Asür kibongtem den ni mangyim lemsateper. Ketdangsertemi yirua alirtem yaritsü ni mepishir,” ta metetdakja liasü.
Yashi nikongdang Congress Tir, Sonia Gandhi-ia la temang manemi aliba ajanga lai la adokba constituency, Rae Bareli mesemdangtetba atema tesasaba olen ka lemsatepa liasü.