Rahul Gandhi ya pa molungka agi politician akümba masü: Lal Thanhawla

Aizwal, October 4 (Agencies): Mizoram Chief Minister Lal Thanhawla-i ashiba agi, Congress party pur ajaki Rahul Gandhi tir mendeni ajungkettsütsü asoshi molungtepa telemtetba agiogo, kechiyong Sonia Gandhi shiba temang manemi ali, la melena lenir ka nüngdaker.
Congress tatong tir Rahul Gandhi tir mendeni ajungkettsütsüla asü tangar tasen ka shim nung ajungtsü, ta asüngdang dang Lal Thanhawla-i langzüba agi, “Lenir tapu balala lir. lenir kar yangluteter aser karbo nem bo asaa nongloktsür. Rahul Gandhi ya pa molungka agi politician akümba nisungka masü, saka party-i lenir tashi tait ka nüngdaker.
“Tia maka Sonia madam temang manemi kümogo, anungji Congress puri party ya lenir ka nem anidaktsüner. Tang joko Congress lenirtem aser pusemertem ajaki Rahul nem party anidaktsütsü asoshi telemtetba agiogo.”
Lal Thanhawla ya Chief Minister pongubenbuba inyaker. Pai ashiba agi, BJP lenisüba kübok northeast nung North East Democratic Alliance (NEDA) kümteta lir, saka taruba küm state election nung iba party atema tetsükdaktsü adoktsü, koba Congress puri küm teko atonga yimsü süa arudar.
“Parnoki inyaksaba maparen ajanga NDA sorkar taruba küm election nung tetsükdaktsü adoktsü,” ta pai ashi.
2014 Lok Sabha election sülen state aika nung Congress pur election nung tamakok anguba indang asüngdang dang Lal Thanhawla-i ashiba agi, Centre nung küm aika yimsü asüba ajanga nüburtemi Congress party lakteta aküm.
“India aser Mizoram nung dang masü alima ajunga nung party kati dang mapang talangka yimsü süra nüburtemi laktetter,” ta pai ashi.