Rahul-i Congress HQ nung mapang tali intoktsüla: Dikshit

New Delhi, April 28 (Agencies): Congress lenir tain aser taoba Delhi Chief Minister, Sheila Dikshit-i, Congress tatong Tir, Rahul Gandhi-i tetsü, Sonia Gandhi-i nüburtem nem mapang peria agütsütetba ama paia inyaktsüla, ta ashi.
“Ni Rahul Gandhi nem nüburtem atema mapang tali intokdaktsüner,” ta Delhi Chief Minister asemben tashi inyakla, Dikshit-i ashi.
Dikshit-isa, “Rahul Gandhi dak lenir dak aketba sempet ajak lir, saka pai linük yimtiba nung aliba party office (headquarters) nung mapang taliba intoktsüla,” ta ashi.
Tesüiba mapangtem bilemteta Sheila Dikshit-i, küm 19 tejaklen Sonia Gandhi Congress Party Tir akümba sülen lai anogoshia Congress headquarters nung ghonda ana-asembo mapang intoka aruogo, ta ashi.
“Yamaji Rahul-ia inyaktsüla,” ta laisa ashi.
Lai ashiba agi, lai ashiba ama Rahul-i inyak nungbo Congress headquarters nung teti nisung longsoa mazüngi alitsü.
Arishi küm 79 tain, Dikshit-isa, Rahul Gandhi dak lenir ka dak aketba sempet tajung aika lir, saka pai pa inyakyim melenshitsüla, ta ashi.
Tamalena Dikshit-i, party tatong Tir (Rahul) ano shisatsü junga main, aser ano mapang nüngdaker, ta jembia liasü.
State aika nung Congress jenjang kechiba mejungi akumer ta asüngdangba langzüdang Dikshit-i, ”Yimtenren oshi kanga melenshiogo. Iba ama temelenshi mapang ka nung Congress-i jenjang yanglutsü merangdar. Rahul ano shisatsü junga main, pa arishi küm nunga tanur. Pa arishi küm 40 tema dang lir. Pa nem ano mapang agüjang. Aluyimertem atema bilemja inyakbabo Rahul dang lir,” ta ashi.
Rahul Gandhi nem mapang kobika agütsütsüla ta asüngdangba langzüdang lai, ”Pa lenmang talangka jajaogo. Pa ano Ato kilonser maküm, kechiyong iba maongkaji tesülen arutsü, pai pa teinyaktsü inyakdar,” ta ashi.