Rahul-i Feb. 15 nü Assam nung nüboyim tenzüktsü

New Delhi, February 13 (Agencies): Northeast state, Assam nung Congress Party-i maneni sorkar tashi angutsü nükjidong nung Hombarnü (February 15) Congress Party tatong Tir, Rahul Gandhi-i assembly election atema nüboyim sentong tenzüktsü.
Assam nung taruba assembly election nung Congress-i BJP nungi tayongzükba tulu ajurua aliba mapang ka nung Hombarnü Congress lenir Rahul-i Chief Minister Tarun Gogoi’er constituency, Jorhat nung lokti senden ka nung jembitsü.
Assam nung tesüiba küm 15 tashi Congress sorkar tashi nung lir, aser tan election nunga parnoki tanga party den meloktepi kijai tokteptsü.
Ano külen BJP-i Union Minister, Sarbananda Sonowal par Chief Minister candidate asütsü atema shima lir.
Rahul-i anogo ananü state semdangba mapang February 15 nü Sonitpur district nung booth workers den senden ka ayonga akatsü aser kasa anogo nungsa Lakhimpur district nung party nung inyaker tetsürtem den senden ka akatsü.
Rahul-isa Upper Assam Sivasagar nung süngolu nung aayanger lenirtem den aser ano Youth Congress aser NSUI lenirtem dena shisa lemsateptsü.
Tasüngnü, February 16 nü Sivasagar district nung pai party lenirtem den yimdong süa jajatsü sentong lir.