Rahul-i JNU semdangba atema Cong-i aaktsüla: Amit Shah

Vrindavan, March 05 (Agencies): Jawaharlal Nehru University (JNU) dak sentakba ken o nung Honibarnü BJP tongti, Amit Shah-i, Congress tatong Tir Rahul Gandhi-i JNU campus semdangba atema Congress Party-i aaktsüla ta aitsüba den külemi, ‘linük anema yimyim ayimabaji’ sademsadema jembiba ta ashitsü akok asü (?) ta Congress lenirtem dang asüngdang.
Bharatiya Janata Party (BJP) indang youth wing, Bhartiya Janata Yuva Morcha nung inyakertem senden nung jembidang BJP Tir, Amit Shah-i, JNU ken o ya party-i linük meimba indang tongtibang onük lir, ta ashi.
“Mamangtettsüsa tensa ka yanglutetogo. Linük anema yimyim ayimbatemji sademsadema jembiba ta rateter. Congress tatong Tiri campus semdanga, itemji (yimyim) angashidaktsütsüla kechiyong ibaji pei tebilemba sademsadema jembiba lir ta jembiba atema Congress-i aaktsüla,” ta Amit-i ashi.
“Item yimyimji sasemsadema jembiba süra, linük anema inyakbaji kechi (?)” ta pai Congress Tir, Sonia Gandhi dang asüngdang.
Shah-i party nung inyakertem dang Centre nung BJP sorkar küm 25 tashi alitsü atema meranga inyakang, ta ayongzük.
“Küm pongu nung terenlok alitsü aser linük ainttsü iba den arrtsülen kümzüka alitsü, ajisüaka India ya ‘vishwaguru’ ka akumtsü atemabo BJP sorkar küm 25 tashi alitsüla,” ta pai ashi.
Congress aitsütsü nükjidong nung taoba Ato kilonser Manmohan Singh aija Shah-i, Ato kilonser Modi dang nungibo Singh-i bendang linük timba semdang, ajisüaka pai semdangbaji atanga tejang kangabo matang, ta ashi.
“Pai (Singh) pa ket nung aliba kaket tapak ana nung English agi zülua aliba nungi azüng. Khenkhenbo pai Thailand atema renemba onükji Malaysia nung azüng aser Malaysia atema renembaji Thailand nung azüng. UN nung Modi-i Hindi oshi agi jembi aser linük nübur ajak nüma tangtet,” ta Shah-i ashi.