Rahul-i linük anemertem pusemba ajanga linük mezüngmeshir: BJP

New Delhi, February 13 (Agencies): Tawa police-i JNU campus mita university kaketshir tir apuba anema lungkak aittsü atema ayongba kaketshir senden nung Congress tatong Tir, Rahul Gandhi-i jembiba atema BJP-i pa aija, Rahul-i linük anemertem pusemer, ta shiogo.
Osangbenertem den jembidang BJP National otongdar, Srikant Sharma-i, “Nisung tekapu ka shi adenshir ‘Pakistan Zindabad’ aser ‘Bharat ki barbadi tak, jang rahegi jang rahegi’ ta yimyim ayim. Iba ya tangatetba ka masü. Iba ya linük anemba lir aser parnok pusemtsü atema Rahul Gandhi yang (JNU Campus) jagi ao,” ta ashi.
“Iba ya linük mezüngmeshiba ka lir aser asen linük atema taküm tenla agüja asürtem mezüngmeshiba ka lir. Pai asen linük Temzüng aser judicial mezüngmeshiogo,” ta BJP otongdarisa ashi.
Rahul Gandhi-i Jawaharlal Nehru University campus semdangbaji kangasa tia maka ka lir ta shia BJP lenir Sharma-i Rahul dang, shisaliok rejutem ya yimtenren sabang ka ama mamshitsüla, ta shiogo.
“Iba ya ajanga Congress Party jenjang kanga majungba tia sayur, ibaji ajanga parnoki linük anemba maparen pusemer aser nisung ishika pusemer. Iba ya BJP-i aitsür,” ta Sharma-isa ashi.
“India anemba yimyim ayimdang item (Congress) nisungtemi temerenshi agütsütsü khanga liasü, aser sorkari temerenshi agütsüdangbo parnoki lungkak aiter. Iba ya kanga tia maka,” ta paisa shisem.
Taoba Mongolbar JNU nung, 2013 küm Parliament amakba ken o nung aija Afzal Huru alenseta südaktsüba atema kaketshir telok kati sorkar aser linük anema yimyim ayimba ken o nung Delhi police-i JNU students union Tir Kanhaiya apu.
Kanhaiya ya CPI’s student wing All India Student Federation (AISF) züngsem ka lir.