Rahul-i Naga Accord onük atema Modi aitsür

Guwahati, February 16 (Agencies) : Mongulbarnü Congress Tatong Tir, Rahul Gandhi-i Naga Accord onük nung ammeter Prime Minister Narendra Modi aitsü.
Naga Accord tenangzüktep agiba osang tai prokshiba aser North-east state tem nungi Chief Minister tem den iba onük melemsatepba atema Rahul-i Modi aitsü.
Mongulbarnü Assam kübok Sivasagar district nung public senden ka agidang Rahul-i iba onük jembi.
“Parliamentary elections nung takok anguba sülen, künü Prime Minister-i Congress Tir Sonia dang phone ajanga ‘Nenoki küm 40 tsüngda meinyaktetba ka ni küm ka nung inyaktetogo’ ta ashi. Idangji Sonia-i kechi inyak ta asüngdangdang Modi-i ‘otsüsütsü Nagaland Accord tenangzüktep agiogo’ ta langzü” ta Rahul-i tanü metetdaktsü.
“Iba osang angashia Sonia kanga aoksa aser lai kü dang Assam, Arunachal Pradesh, Manipur aser Nagaland Chief Minister tem den osang tejangja metetpelang ta ashi. Ni parnok den phone ajanga accord indang osang asüngdangdang, parnoki kecha memetet ta langzü” ta Rahul-isa shisem.
“Manipur, Arunachal Pradesh aser Assam nungi chief minister temi accord dak sendakba osang kecha memetetba agi, onoki union home minister Rajnath Singh dang accord nung aliba onüktem metetnüa asüngdang, saka kanga dang tesüngmangtsüka paia accord indang memeti liasü” ta Rahul-isa ashi.
State pezü indang arrtsü dak sendaka aliba onük ka atema kodaser Prime Minister-i state Chief Minister tem nem memetetdaktsüi telemtetba agi, ta Congress Tatong Tir-isa asüngdang.
Narendra Modi-i aniba NDA sorkari nübortem madak tangatetba ka lidaktsütsü meranger aser Assam indang lipok otsü samatsütsü meranger, ta Rahul-isa aija jembi.
Paisa ashiba agi, PM Modi-i Nagpur (RSS headquarters) nungi remote control ajanga northeast madak yimsü sünür.
Iba sentong nungsa Rahul-i Assam Chief Minister Tarun Gogoi nem tenüngsang agüja jembi.
“Küm 15 tejakdang, Assam nung ozüng alema mapa inyakba, azütokshi, tejashi aser tesempatep agi sünga liasü. Ajisüaka, Assam nung Tarun Gogoi tekolak ser Congress sorkar aruba sülen, yimjung tanaben bener aru aser state renloktsü tenzük” ta pai ashi.
Taoba mapang Assam nung lanurtem asoshi teimla kecha maliasü, aser iba mapang nisungtemi Assam indang jembidang, ozüng alema inyakba onüktem dang jembia liasü, saka Congress sorkar aruba sülen item ajakji melenshiogo, ta Rahul-isa ashi.
“Ni Tarun Gogoi den metetteper küm 10-12 shi süia arur aser kodang state timtemdir Tarun Gogoi-a timtemer” ta Rahul-isa shisem.