Rahul-i NCP lenir Sharad Pawar ajuru

New Delhi, Metsüremi 15 (Agencies): 2019 küm Lok Sabha elections nung opposition party temi BJP anema lokteper tokteptsü atema inyakba maparen dak sendakba nung Congress Party Tir, Rahul Gandhi-i NCP tongti lenir, Sharad Pawar ajuruogo.
Osang angazükba agi, yashi Rahul-i NCP lenir, Pawar’er kidangi oa ajurua senden amen.
Rahul-isa Trinamool Congress tongti aser West Bengal Chief Minister, Mamata Banerjee-i Metsüremi 28, 2018 nü Delhi-i semdangba mapang la ajurutsü tebilemba lir.
UPA chairperson, Sonia Gandhi-i Opposition party 20 nungi lenirtem ajurua senden amenba sülen Rahul-ia Sharad Pawar ajuruba osang ya angazüker.
Opposition lenirtemi 2019 küm BJP anema longjemer tokteptsü atema jembiba mapang ka nung Uttar Pradesh nung teloktep party temi BJP madak Lok Sabha menden asem nung takok angu.
Samajwadi Party-Bahujan Samaj Party teloktepi Gorakhpur aser Phulpur Lok Sabha menden na nung BJP tamakok ngudaktsü.
Iba takok nung ajemdaker RJD nungi Tejashwi Yadav aser socialist lenir, Sharad Yadav na densema opposition lenir aikati linük jenjang nung opposition party temi Grand Alliance teloktep atema jembir.
Menden asem election osang sangdongba sülen Rahul Gandhi aser Trinamool Congress tongti, Mamata Banerjee nati takok angur candidate tem nem tenüngsang agutsü.
Rahul Gandhi-i, iba election osang ajanga voter temi BJP dang jashiba sayur, ta ashi.
Tejashwi Yadav-i, Samajwadi Party aser BSP nati lokteper 2019 Lok Sabha election nung tokteptsüla, ta ashiba den külemi Congress danga iba teloktep nung adentsü asüngdangogo.
“Grand Alliance atema tang mapangi sempeter, nüburtemi ibaji aginer. Linük raksatsürtem dang lesson ka sayutsü nüngdak,” ta paisa ashi.