Rahul-i pa jenjang ajungtsü atema Modi aitsür:Smriti Irani

New Delhi, December 20 (Agencies) : Mongubarnü BJP lenir Smriti Irani-i, Congress Tatong Tir, Rahul Gandhi-i Ato kilonser aitsübaji pa political tsütsü masütsü atema lir. Tang pai Modi aitsüba ya pa tarutsü lenmang yanglutsü merangerba lir, ta CNN News18 dang ashi.
“Opposition teloktemi Modi anembaji tang ang masü saka pa Gujarat chief minister asüba mapang nung lir. Iba amai pa aitsübaji pa atema yimya ka amai kümogo aser yamaji pa aitsüaka pai pa teinyaktsü mapatem kecha nunga tamakok maludaktsür. Ajisüaka Rahul bo tebilemtsüa kecha mali aser mapaa mali,” ta Amethi, Uttar Pradesh nung 2014 küm Lok Sabha election mapang Gandhi madak tamakok angula, Irani-i ashi.
Gandhi aija jembidang lai, pai Amenthi senzüka yutsüba agi Union minister-ia pa aitsüogo. Amenthi nung pa mapang talangka MP inyaka arudang pai kechi inyakja kar ? Pai UP nungbo rally tem ayonga amunger ajisüaka Amenthi-bo mesemdanger kechiba süra Amenthi nüburtemi pa dang Rajiv Gandhi Charitable Trust-i alizükba ali kechiba okadaki melaba ama meyipa magütsür ta asüngdangtsü tsübur, ta ashi.
Nija company kati bicycle yangluba company ka lapoktsü atema alizükba ali ka nung project ji metenzüktetba ajanga yokshidang Rajiv Gandhi Charitable Trust-i alizükba ali acre 65 ji meyipjang ta okadak ajanga 2015 küm tetuyuba agüja liasü.
Irani-i iba ali Gandhi trust dang ayokba aitsüba den ali rakzükba atema Gandhi’er kibonga aitsü. Ajisüaka Gandhi’er kibong-i lai aitsübaji tamendakdak maliba ken o ta aitsüogo.
Ano Irani-isa demonetisation ken o nung congress-i Parliament nung jangjungba atema aitsüogo.
“Congress-i parnok ajangzüktsü mechi nung demonetisation atema kecha otoktep mesüra o lemtep makatsü tebilemba nung inyaker. Tan Parliament amen tenzüker mezüng anogo nungi parnoki senden kanga jangjunga aruogo,” ta lai ashi.
“O toktepji telok ka kijai magitet. Parliamentary Affairs Minister, the Finance Minister mesüra Ato Kilonser aser sorkari Parliament takok ngua süngjema amentsü aiben mepishiogo,” ta Irani-isa ashi.
Sen nokdangba inyakyim ya kar kija mulung agi inyakba masü ta sayutsü atema opposition-ia nüngittsüba asü. Tang ama teraksa aser ochi mashi sen bulua amshitepba mapang ka nung yimsüsüba nung meputepba ajak tezü külen yutsür asenok ajak longjemer raratsü nüngdak. Asenoki digital inyakyim magizüki sen teka nung amshitsü atema kija nokdakba ajanga nüburtem ajangzüktsü asü,” ta lai asüngdang.