Rahul-i tekaraba nung Tir menden agizüktsüla: Sachin Pilot

New Delhi, August 26 (Agencies): Tanü Rajasthan Congress tongti lenir Sachin Pilot-i, Rahul Gandhi-i tekaraba nung Congress Tir menden agizüktsüla, ta ashi.

Sachin Pilot-i Sonia Gandhi maneni Parliamentary Party tongti inyakdaktsüner.

Yaküm Lok Sabha election nung Congress-i tamakok mejungi anguba sülen Congress tatong Tir Rahul-i party tashi itshidaktsüogo, ta Pilot-i ashi.

“Rahul Gandhi-i tekaraba nung agizüktsüla (Congress Party Tir),” ta pai osangbenertem dang ashiba den külemi paisa, ibaji pa nija tebilemba ka dang lir kechiyong “Ibaji party lenirtemi dang lemtettsü,” ta ashi.

Rajastan assembly election aser Lok Sabha election naprongla nung tamakok anguba sülen Rajasthan unit len anitsü asoshi Rahul-i Pilot shima liasü.

Pilot-i, state tem nung party tashi itshia 2019 küm election nungbo takok ngua Centre nung tashii arutsüji Rahul asalendong lir, ta ashi.

Parliament nung Congress-i tetsükdangtsü bener arutsü ta aitsüba dak sentakba nung pai, Lalit Modi aser Vyapam ochimashi ken o nung BJP lenirtem anema noktaktsüji opposition party tongti teinyaktsü shilem, ta ashi.

NDA sorkar aitsüba dak sentakba nung Pilot-i, “Mezüng küm ka mesüra ana nungbo sorkar ajaki junga yimsüsür. Saka nüburtemi joko, iba (BJP) sorkari parnoki nangzüka alibatem mataloktsütsü ta jembi tenzükogo,” ta ashi.