Rahul Johri 1 buba BCCI CEO akümer

New Delhi, April 20 (Agencies): India ajunga nung cricket asayatsüren ketdang asür, Board of Control for Cricket in India (BCCI)-i par Chief Executive Officer (CEO) inyaktsü asoshi Rahul Johri shimba osang tanü, Bodbar nü sangoktsüogo.
Züngsem 3 densemba Lodha ludeni taküm January ita tuyuba ama inyaka, BCCI-i tan par mezüngbuba CEO shimer lir.
“BCCI nung CEO inyaktsü asoshi Johri shimogo aser pai taküm June ita 1 nü nungi tenzüka CEO mendenji abentsü,” ta BCCI Secretary, Anurag Thakur-i osang jangjashitsü.
BCCI-i temzüng ozüng benshitsüren aser asaya ketdangsütsüren benteta inyaktsüsa, CEO ka shima pa nem ketdangsütsüren khuret bendaktsütsü tetuyuba ka Lodha ludeni agüja liasü.
Johr-i BCCI CEO akümba jakdang satellite aser cable Television tentet, Discovery Networks (DN) Asia Pacific nung Executive Vice President aser DN South Asia nung General Manager inyaka liasü.