Rahul leniba nung CWC senden amen

New Delhi, Dec. 22 (Agencies): Rahul Gandhi Congress Party Tir akümba sülen tanü mezüng pa leniba nung Congress Working Committee (CWC) senden amen, aser iba senden amenba sülen pai, BJP tamendakdakji yazü nung ajemdaker amenoka lir, ta aitsü.
CWC senden tembangba sülen osangbenertem den jembidang Rahul-i, “Modi Model mesüra bank account shia nung sen lakh 15 nangzükbatem, demonetisation mesüra Gabbar Singh Tax (GST), ajakji tiyazü lir,” ta ashi.
Modi Model ji tiyazü lir, ta shia Rahul-i, terenlok tenüng amer BJP-i Gujarat nüburtem meyong auyar, ta aitsü.
“BJP tamendakdak ajakji tiyazü nung amenoker lir. Gujarat nung Modi Model ji tiyazü lir. Onoki nüburtem den jembiba mapang nung parnoki kecha model mali, ta ashi. BJP-i parnok indang rongsen auyar,” ta paisa ashi.
Rahul-i maneni BJP Tir, Amit Shah’er jabaso senotsü nung ochimashiba aser Rafale aircraft alizükba ken o nung Congress nem tai tongloktsüba onüktem nung Ato kilonser, Modi-i ola madokba atema aitsü.
“Ka nungi ka, ta BJP-i yazü jembibatem jungkai adokdar. Mezüngbuba nung Amit Shah’er jabasoi ita asem tsüngda sen 50,000 nungi sen crore 80 kümdaktsü. Iba atemaji Ato kilonseri kecha mejembir. Tanabuba nung Rafale deal melenshiogo, aser industrialist kati dang iba nungjagi tajangzük ajak agir. Onoki Modi dang tasüngdangba asem asüngdang, ajisüaka pai ka danga melangzüteter,” ta paisa ashi.
2G ken o nung court-i obendang agutsüba dak sendakba nung Rahul-i, UPA yimsüsüba mapang nung iba ken o nung tai tongloktsübaji NDA-i yazü nung tai tongloktsüba liasü, ta ashi.
“Ajaki 2G indang meteta lir, nenok ajak dang ochi jungkai adoka sayuogo,” ta paisa ashi.