Rahul mozü bener lia apu, Vajpayee teyari ajanga pa chiok: Swamy

Jodhpur, July 22 (Agencies): Lalit Modi yariba atema mangatettep ken o nung densema alisang, Rajasthan Chief Minister Vasundhara Raje pusemba dak sentakba nung tanü BJP lenir Subramanian Swamy-i Congress dang, tangar maitsüdang pei tashimait tama shisadangtsüla, ta shiogo.

Swamy-i ashiba agi, 2001 küm Congress tatong Tir Rahul Gandhi ket nung US sen lakh 1.60 den temesepba mozü bena aliba ajanga Federal Bureau of Investigation (FBI) ketdangsertemi pa apu.

Iba sülen Congress Tir Sonia Gandhi-i iba mapang nung Ato kilonser Atal Bihari Vajpayee den jembi. Iba yongji Vajpayee-i taoba US Tir George Bush den jembiba sülen Rahul Gandhi chiok, ta Swamy-i ashiba Hindi osangkaket ka ajanga metetdaktsü.

Lalit Modi ken o nung party lenirtemi Foreign Minister Sushma Swaraj pusema sangdong agütsüba ama kechiba party lenirtemi Chief Minister Raje pusemba sangdong magütsür, ta asüngdangba langzüdang Swamy-i, “Ni la (Raje) meteta lir. Lai la sasa kümzüka alitsü koka lir. Lai party lenirtem shinga teyari menüngdaker,” ta ashi.

“Raje-i inyakbaji medemer tejen ka dang temeim mapa tera sayuba dang lir, ibaji temzüng alema aibenlen ka masü,” ta paisa ashi.

Ano Raje’er jabaso Dushyant Singh-i temzüng alema sen crore 11 dak tema pa indang Niyant Heritage Hotels Pvt Ltd account nung inokba dak sentakba tasüngdangba langzüdang Swamy-i, ibaji Congress-i okadak benoktsü jazüker, ta ashi.

“Dushynat-i aibelen langka danga inyaka lira kechiba Congress-i okadaki oa pa anema mebenoker aser pai aibelenogo ta kuli mesayur (?),” ta ashi.