Rahul o Sathish nati India atema gold medal ana bendenloktsü

New Delhi, Rongchii 07 (Agencies): 2018 Commonwealth Games asayamung anogo tasembuba Küptoknü (Saturday) Gold Coast nung asayaba mapang India nunger weightlifters temi maneni takok ngua linük atema gold medal ana bendenloktsüogo. Tang tashi asaya aruba nung India team-i gold pezü, silver ka aser bronze medal ka, ta nguteta lir aser item medal ajak ya weightlifting asayar temi ngutetba lir.
Weightlifting
Iba asayamung anogo asembuba tebur kg 77 weightlifting tetoktepa nung India nunger weightlifter Sathish Kumar Sivalingam takoker rongnung densema gold medal ngua tenzük. Külem asayar Sathish-i küm pezü tekjaklen Glasgow nung CWG asayamung nung gold medal ngua liasü aser taküm iba asaya nunga pai ajak agi kg 317 tashi ajungketa takok nguogo. Commonwealth asayamung nung India nunger weightlifter tebur gold medal atonga angur rongnung Satish ya mezüng lir.
Kasa anogo, mapang tatsü ka lir külen tebur kg85 telemsa weightlifting asaya nung India nunger Ragala Venkat Rahul-i kg338 tashi ajungketa India atema gold medal pezübuba ngutet. Silver medal angusang Samoa nunger Don Opeloge-i tasembuba aser final merangdangba nung kg191 majungketet, ibaji ajanga Rahul-i jenjang temaba koktetta liasü.
Kasa asaya tetsür kg 63 telemsa asaya nung India tsür rongnungi weightlifter Vandna Gupta-i snatch nung kg80 aser clean & jerk nung kg100 ta ajungketa ajak agi kg 180 tashi ajungketa jenjang pungobuba nung tembang.
Hockey
India aser Pakistan na tsüngda tebur hockey asaya nung Pakistan team-i minute tatemlen goal ka idakja goal 2-2 nung tembang. Asaya nung India tebur Hockey team 2-1 agi tejaklen liasü saka Pakistan team-i minute 59buba nung goal ka idakja asaya draw nung tembang.
Table Tennis
Table Tennis asaya nung India nunger asayartemi kanga dang junga asayar Malaysia team madak takok nguogo. India tebur aser tetsür team anapronglai tetokteper team madak 3-0 agi takok ngua semifinal tongtetogo. Tetsür kija quarter-final asaya nung India tsür Manika Batra aser Madhurika Patkar nati Ying Ho aser Karen Lyne madak 11-9, 11-7, 11-7 aser 7-11, 11-9, 11-9, 11-3 agi takok angu. Patkar aser Mouma Das nati Ho aser Ai Xin Tee madak 11-8, 10-12, 11-8, 11-7 agi takok nguogo.
Tebur kija quarter-final asaya nung India nunger Harmeet Desai-i Malaysia nunger Chee Feng Leong madak 11-4, 12-10, 11-6 agi takok nguogo. India nunger Achanta Sharath-ia Malaysia nunger Muhammad Ashraf Haiq madak 11-8, 11-7, 11-6 agi takok ngua India team 2-0 agi tejaklen liasü. Iba sülen tebur tarep asaya nung India nunger Desai aser Sathiyan Gnanasekaran nati 11-7, 11-6, 11-7 agi Malaysia nunger Javen Choong aser Chee Feng Leong madak takok ngua 3-0 agi India nungeri akok.
Badminton
India badminton team-i maneni shilem tajung agia takok ngua asaya arudar aser kasa sempet benshia team temeyoktep badminton quarter-final Malaysia den asaya nung 3-0 agi takok ngua semifinals tongtetogo. Tebur tarep asaya ka nung India nunger Satwik Rankireddy aser Chirag Chandrashekhar Shetty nati Malaysia nunger Aatish Lubah aser Christopher Jean Paul madak 21-12, 21-3 agi takok nguogo. Tetsür tarep asaya nung kanga dang ayongayonga India tsür Ashwini Ponnappa aser N. Sikki Reddy nati 21-8, 21-7 agi Malaysia tsür Aurelie Marie Elisa Allet aser Nicki Chan-Lam na kokogo. Tebur kija asaya ka nung India nunger Kidambi Srikanth-i Georges Julien Paul 21-12, 21-14 agi akok.
Boxing
Tetsür boxing kg60 telemsa asaya nung Küm pezü tejaklen Glasgow asayamung nung silver medal angula Sarita Devi-i la den tokteper madak takok ngua quarter-final tongtetogo. Iba asaya nung Sarita-i ‘unanimous verdict’ 30-25 agi Barbados tsür Kimberly Gittens madak takok angu. Tebur tsüngtepa nung India nunger Mohammed Hussamuddin aser Manoj Kumar nati kanga dang ayonga takok ngua ‘last-eight’ tongtetogo. Tebur kg 56 telemsa asaya nung Mohammed Hussamuddin-i Vanuata nunger Boe Warawara madaka takok nguogo. Kasa asaya tebur kg69 telemsa asaya nung Manoj Kumar-i Tanzania nunger Kassim Mbundwike kokogo.
Swimming
Tebur 50m backstroke swimming nung India nunger Srihari Nataraj-i jenjang tasembuba ngutetta taruba asaya atema qualify süogo.
Lawn bowls
Tebur Triple Lawn bowls asaya nung India team-i South Africa team madak 18-17 agi takok nguogo. Tetsür kija asaya nung India tsür Pinki-i Niue tsür Pauline Blumsky madak 21-9 agi takok nguogo.