Rahul sota ayuba atema NPCC-i longkak ait

Dimapur, November 03 (TYO): November 2, 2016 nü New Delhi nung AICC Tatong Tir, Rahul Gandhi sota ayubaji democracy inyakyim anema lir, ta aija Brihostibarnü NPCC aser DCC Dimapur na senteper longkak aitogo, ta NPCC Media cell sangdong ka ajanga metetdaktsü.
DCC, Dimapur den NPCC züngsemtem dena Congress Bhavan, Dimapur nungi DC Court Junction tashi aoba sülen DC office tashi longkak aita orr Deputy Commissioner, Dimapur ajanga India Tir dangi temepishiba shidi ka agütsüogo.
NPCC Tir, K. Therie den DCC Dimapur Tir, Kughato S. Aye aser Party lenirtemi anir iba shidi ADC Dimapur ket nung ammoktsü, ta sangdong nung shia lir.
NPCC-i linük Tir dangi züluba temepishiba shidi nung Therie-i, NDA sorkari democracy anema aser nüngdak makaba nung Rahul Gandhi aser tanga lenirtem sota ayuba ngua mepelar. Police-i tim mesüi iba ama mapa inyakba ajanga alima matsüngdang onok nüma matanger, ta metetdaktsü.
Linük atema taküm bendanga agütsür nem akhüm agütsüba aser asür kinungertem melung senüptsübaji ozüng alema inyakba mapa ka masü. Subedar Ram Kishan Grewal ama linük atema taküm tenlar lakh aika alitsü ta onoki amanger. NDA sorkar dak temulung alemtsü maliba ajanga Grewal-i linük tarutsü atema pa taküm tenla agütsü, ta parnokisa ashi.
One Rank One Pension (OROP) menutsübaji sepai nungi anisüngzüker alirtem aser par kinungertem anema lir. BJP nung madenba lenirtemi mapa tajung ka atema jajadang sota ayuba ajanga Modi-i aniba sorkari tangar mezüngshiba sayur. India Temzüng kübok Arrla 19 (1) nung linük nübur ajak nem sadoka jembitsü temeten agüja aliba parnok mapa agi raksatsür. Anungji NDA sorkari ozüngi alema aser democracy anema iba ama mapa inyakbaji onoki aitsür. Temzüng nung aliba ama inyaktsü atema tetuyuba agütsütsü asoshi Ato Kilonser Narendra Modi nem shisa agüjang, ta kasa temepishiba shidi nungsa shia lir.