Rahul ya Khristan lir; 10 Janpath nung Tenla ki lir: Swamy

New Delhi, September 28 (Agencies): Tawa Congress tatong Tir, Rahul Gandhi-i Gujarat nung tekülem kitem (Hindu nunger tekülem ki) semdangba aija Brihostibarnü BJP lenir aser Rajya Sabha MP, Subramanian Swamy-i Rahul dang, na Hindu nunger, ta nai mezüng kuli agütsütsüla, ta ashi.
“Tamasa pai pa Hindu nunger ka lir ta sangdongtsüla,” ta Swamy-i ashi.
Congress lenir maneni aija pai, “Pa Khristan ka lir ta ni melung malemer aser 10 Janpath telung nung pa indang Tenla ki ka lir,” ta ashi.
Rahul Gandhi-i Gujarat anogo asemnü semdangba mapang nung pai Hindu nunger tekülem ki aika semdanga sarasadema liasü, aser iba dak sendakba nung tanü BJP leniri iba o ya jembiogo.
Rahul Gandhi-i tekülem kitem semdangba ya, par party, Congress ya Hindu anemer party ka masü ta sayutsü atema liasü, ta paisa ashi.
Congress-i ashiba agi, Rahul-i tekülem ki balala semdangbaji BJP aser RSS-i Hindutva mapatem inyakba anema liasü, ta ashi.
Ano BJP-ibo, Gandhi-i tekülem ki semdangbaji tema tazütsü ka inyakba dang lir, ibaji Hindu nunger den kecha sendaktepa mali, ta ashi.
“Congress-i election balala nung takok manguba agi pai aji oda inyak,” ta BJP-i ashi.
Hombarnü Rahul-i BJP-i yimsüsüba state semdang tenzüka Dwarkadhish temple nung tama sarasadema liasü.
Gujarat semdangba mapang nung Rahul Gandhi-i Surendranagar district nung Chotila tekülem ki, Kagvad yimdak Khodal Dham tekülem ki aser Rajkot district nung Jalaram tekülem ki semdanga liasü.
Iba mapang nung Rahul-i Goods and Services Tax (GST), demonetisation aser aluyimertem dang sentsüh atoktsü onüktem nung ajemdaker BJP aser Ato kilonser, Narendra Modi aija liasü.