Railway High School tajungba küma yanglutsü

Dimapur, May 14 (TYO) : Dimapur nung Railway High School junga mouteti aliba jenjang ngua tanü Deobar nü Railways nung Minister of State , Rajen Gohain -i school kiojen aser lesson sayuba dak aketba inyakyim ajak tajungba küma yanglutsütsü nangzükogo.
Iba school ya lapoker küm 65 buba ajungbamong sentong nung jembidang, Gohain-i iba mapa inyaktsütsübaji nangzük.
Paisa ashiba agi, parnoki school tajungba küma yanglushitsü asoshi May 28 nü Advisory Committe ka shimtsü aser school nung CBSE course agidaktsütsüsa inyaktsü. Paisa school kiojen yanglushitsü aser Science laboratory den kaketshirtem atema metsümeshidak tajung yanglutsütsü nangzük.Government ket nung sen lir aser school reprangtsübaji Railways department khuret lir ta Gohian-isa metetdaktsü. Paisa school ketdangsertem den akhidang iba school nung azüngertem den jembidang, Railways department-i pei meyong school yamai mesenmetua mamshitsüla, kechiyong lokti ajungtsü atema reprangtsübaji parnok khuret lir ta metetdaktsü.
Iba school nung taoba mapang azüngertem aika arua iba school tajungba küma yanglushinüba tejangraba sayuba asoshi parnok ajak dang Gohain-isa pelaba metetdaktsü.
Iba sentong nung tetushi tejaoker, Tovihoti Ayemi-ia mapang tatsüka agia jembidang, iba ama school tejen ya akhi ama sentsüwangshia shia arudaktsütsü asoshi ajaki temulung agüja inyaktsüla ta metetdaktsü. Paisa iba school yanglushiba nung state government-ia akok tashi yaritsü nangzük.
Iba kasa sentong nung Bokajan MLA Dr Numul Momin -ia jembia liasü.
Dimapur nung Railways High School ya Nagaland state mangudang 1951 küm temulungertem kar longjemer anepalua lapokba school ka lir aser iba sülenang 1996 küm Railways nem bendanga agütsü saka iba sülen school ya tamajungba küma ao.