Railway line ajanga Kathmandu-India sendakteptsü: PM Modi

New Delhi, Rongchii (April) 07 (TYO): Tanü Ato kilonser, Narendra Modi-i, India aser Nepal nati railway line tasen ka ajanga Nepal yimtiba, Kathmandu aser India na sendakteptsü atema bangjemogo, ta metetdaktsü.
Paisa, linük anatisa connectivity projects ajak tekaraba nung tembanga inyaktsü atema bangjemogo, ta metetdaktsü
Tanü New Delhi nung Nepal Ato kilonser, KP Oli den külemi osangbenertem senden ka nung jembidang Modi-i iba osang metetdaktsü.
Modi-i, “Onoki Nepal den waterways aser railways terenlok atema inyaktsü alizüng yua lir. Tanü onoki item ama connectivity projects reprangshiogo. Security dak sendakba nung asenok tesendaktep junga lir aser arrtsü tim masüba nung amshiba nokdangtsüji onok nükjidong lir,” ta metetdaktsü.
Kasa osangbenertem senden nung Nepal Ato kilonser, Oli-ia, linük ana tesendaktep tajungba akumtsü aser jenjang tasen ka alangzüktsü atema pai India semdang, ta metetdaktsü.
Oli-isa, “Nepal-i India den tesendaktep tajung ayur aser asen linük ana ya akhidang nungi tesendaktep junga lir aser kati ka yaritsüsa lenmang aika lir. Tekaraba nung Nepal semdangtsü atema ni Ato kilonser, Modi jaokogo, aser ni imlar, tekaratiba nung pai ozü linük semdangtsü,” ta metetdaktsü.
Tanep Modi-i Nepal lenir den senden mena kidanger linük ana tesendaktep onüktem nung o lemtepa liasü.
Tena senden amenba sülen Ministry of External Affairs otongdar, Raveesh Kumar-i twitter ajanga, “Putiotsü tesendaktep aser sobaliba tesendaktep nung ajemdaker nisung tsüngda tesendaktep ayur. Ato kilonser @narendramodi-i Nepal Ato kilonser, K P Sharma Oli, Hyderabad House nung agizüka temaba ketdangsertmi semdangtepba maneni benshia delegation-level ken o jembiogo,” ta metetdaktsü.
Yashi Modi-i Prime Minister’s official residence nung Nepal lenir ajurua liasü. Oli-ia India Tir, Ram Nath Kovind ajuruogo.
Nepal Ato kilonser, Oli-i anogo asemnü atema India semdanga lir.