Railway site nung oset raksatsüba jenjang ano masadang

Tura, May 28 (Agencies): Ri-Bhoi district kübok Byrnihat anasa Ronghona yimtsüng nung railway project site, yashi Khasi Students Union (KSU) North Khasi Hills züngsemtemi amakba dak sendakba nung teraksa adokba jenjang tang tashi police-i masadangi lir.
“Yashi tatalokba dak sendakba nung oset raksaba ajanga takoksa aluba jenjang tang tashi masadangi lir,” ta Ri-Bhoi district SP, Ramesh Singh-i osangbenertem dang tanü telephone ajanga ashi.
KSU puri yashi amakba nung VNR Rail Infrastructure Private Limited meyong earthmover 4, dumper 7 aser vibrator machine ka, ta raksatsüogo.
“Iba ken o dak sendaka aliba nisungtem aputsü asoshi ano mejangjai lir,” ta Shing-i ashi.
Kasa mapang nung Laban aser Rynjah tesem nung yasüng mejangjaba nisungtemi petrol bomb pokloktsü. Police temi ashiba agi, petrol bomb mezüngbubaji Laban nung Pine Mount School anasa aliba Social Welfare office nung aonung 9:00 ako shi nung pokloktsü. Iba sülen aonung 10:40 shi nung mejangjaba lanur anati motorbike nung arur Rynjah police station nung ano petrol bomb ka pokloktsü.
Aji saka tang tashi nung iba lendong ajanga teraksa adokba kecha osang mali.
Ronghona yimtsüng nung railway project site nung yashi tatalokba dak sendakba nung KSU lenir ana Ri-Bhoi police-i pua lir. Police-i pua aliba anaji Khasi Students Union (KSU) North Khasi Hills unit tir, Ferdynald Kharkamni aser KSU Central body organizing secretary, Son Nongkhlaw lir.