Raj Bhavan-i Governor PB Acharya den tepila sentong agi

Dimapur, July 24 (TYO): Raj Bhavan Kohima-i Nagaland Governor PB Acharya aser pa kinungtsü Kavita Acharya na den tepila sentong ayongzüka agiogo.
July 24, 2019 nü Durbar Hall nung iba sentong ayongzüka agidang Governor Acharya-i Raj Bhavan Kohima nung inyakba ketdangsertem, staff aser security nisungtem dang pelaba metetdaktsü.
Raj Bhavan nung mapa inyaktsü lemzükba nung tajangzük lir, anungji nenoki loktiliba tashi itdaktsütsü atema nendaka mapa inyaktsüla, ta Governor-i ayongzük.
“Nagaland tali terenlokba aser jenjang tajungba kümdaktsünür aser iba atema nisung ajaki pei pei teinyaktsü shitak inyaktsüla. North East merenlokra, India kodanga merenloktsü,” ta Acharya-isa shisem.
“Ni Nagaland nung Governor inyakdang shisatsü aika nguogo, medemer aika yimtetogo aser temeim aika nguogo. Nenoki kü dang temeim sayuba aser yariba atema kanga pelar” ta paisa metetdaktsü.
Sentong nung Commissioner & Secretary to Governor, Dinesh Kumar, IAS-ia o jembidang Governor Acharya den külemi inyaksembaji maongka ka liasü ta ashi.
Governor Acharya-i Nagaland meimba aser bilemtsüba atema pa Peoples Governor ta teti bilemtettsü, ta Dinesh Kumar-i ashi.
Taoba küm pungu tsüngda Governor Acharya-i free medical camps, students & teacher exchange programmes aser tanga outreach programmes aika inyak. Raj Bhavan nung service providers den senden amen, lajartem den ajurutepa sensaksem aser parnok Raj Bhavan nung mungdaktsü aser paisa sorkar welfare programmes ajungket, ta Dinesh-i metetdaktsü.
Item maparen balalaji Raj Bhavan nung staff tem atema tajangzük tulu liasü, ta paisa shisem.
Iba sentong nung Joint Secretary to Governor SK Sahoo, Joint Secretary to Governor George Abraham, ADC to Governor Sqn Ldr Vikas Ramola, Caretaker Raj Bhavan Smti Vizolazau Yhome Kuotsu aser Officer in Charge of Special Branch, CRPF aser Assam Rifles nungertemia o tatsütsü jembia liasü.
Sentong nung Addl Secretary to Governor Motuo Sote-i temoatsü meshia sarasadem.