Raj Bhavan-i ketdangser ana den tepila sentong agi

Kohima, January 28 (TYO): January 28, 2016 nü Kohima, Raj Bhavan nung Nagaland Angh, P.B.Acharya aser pa kinüngtsü, Kavita Acharya na, staff tem aser Raj Bhavan nung sepaitemi sodi agir ketdangser, Major K.K.Gautam Aide- De- Camp (ADC) aser Raj Bhavan nung Comptroller, Uttam Kumar Ghosh den tepila sentong ka agiogo, ta Brihostibarnü Raj Bhavan sangdong ka ajanga metetdaktsü.
P.B.Acharya-i ketdangser ana dang Raj Bhavan nung alidang junga tenzükba atema tenüngsang agütsüba den külemi pelaba olen lemsatep.
Angh-isa tena dang Naga nüburtem atema ambassador ka ama asütsü aser parnok aolen ajak nung state nung tajung ajangshibatem lemsatepang ta mepishi.
Major K.K.Gautam-i Nagaland Angh atema Aide- De- Camp (ADC) mapa ya July 31, 2013 nungi January 31, 2016 tashi inyakogo.
Ano Comptroller, Uttam Kumar Ghosh-i küm 25, ita 6 ser anogo 13 inyaker ‘superannuation’ nung mapa nungi anisüngzükogo.
Pai 2010 küm Governor’s Gold Medal agizüka lir. Pai Angh 12 aser secretary 13 den külemi inyaksema aruogo.
U.K Ghosh ya mezüng 1990 küm July 18 nü Storekeeper (SK) inyaka liasü, ta kasa sangdong ajanga metetdaktsü.