Raj Bhavan, Kohima nung Diwali benjung ayonga among

Kohima, October 19, 2017: Diwali benjung anogomong nung tesangwa tapu balala tsüklokba ajanga Raj Bhavan, Kohima sangwatsüba noksa nung angur.

Kohima, October 19 (TYO): India linük rangben den liromedema Brihostibarnü Raj Bhavan, Kohima nunga sentsüh tapu balala milen tsükloker Diwali benjung mongogo, ta tanü PRO to Governor-i sangdong ka ajanga metetdaktsü.
Nagaland Angh, PB Acharya aser pa kinüngtsü, Kavita Acharya nati Raj Bhavan ketdangsertem/ Staff tem kibongtem aser Raj Bhavan, Kohima nung security sepaitem den külemi Diwali benjung among.
Angh, Acharya aser pa kinüngtsü nati Diwali salem osang lemsatepba sülen nanglong lema agütsü, iba sülen tenati tanurtem den jembia liasü.
Diwali mesüra Deepavali ta ajaba benjung ya Hindu nunger atema tongtibang benjung ka lir aser alima tesem ajaklen tanga yimsü amangertemia amonger.
Iba benjung ya tesangwai tammang madak takok anguba benjung ka lir, ibayongji iba benjung dang ya ‘tesangwa benjung’ taka ajar.