Raj Bhavan, Kohima nung outreach sentong ka agi

Kohima, April 24 (TYO): Tanü Raj Bhavan, Kohima nung Visually Impaired School, Nutun Basti, Dimapur aser Government Middle School, Officers’ Hill, Kohima nungi kaketshirtem atema outreach sentong tajung ka agiogo, ta ketdangsertem osang ka ajanga metetdaktsü.
Iba sentong nung jembidang SP, Kohima, Sendongmeren, IPS-i kaketshirtem dang, meranga azüngtsüla aser mapa meranga inyaktsüla, kechiyong taküm nung takok angutsü lenmang tezüba mali, ta ashi.
Paisa kaketshirtem dang, school nung tentur maotsüla mesüra social media sites mamshitsüla, kechiyong item jagi tazüngba nung timtem agütsütsü, ta ashi.
Pai kaketshirtem dang ozüng benshitsü aser taintem akhümtsübutsü metetdaktsü.
Kasa sentong nung Head teacher, GMS School, Mimi Yhoshu-i Angh aser pa kinüngtsü nati GMS School ‘adopt’ asüba ajanga iba school jenjang tajungba kümdaktsüba atema pelaba lemsatep.
Laisa, Angh kinüngtsüi mapang shia school semdangba ajanga kaketshirtem ajungmesoba dang masü saka tesayurtema ajungmesoa tesayur mapa inyaktsü jangradaktsür, ta ashi.
Laisa, parnoki ketdangsüa inyakba ajanga state adener tanga organizations den ajurutepa sentong agitsüsa school-i maongka angur, ibaji ajanga library program ka aser computer workshop agi, koba ajanga tanurtem tazüngba den skills aser technology shisatsü angur, ta ashi.
Angh, P.B. Acharya-i, sorkar school tem nung sensakertem timba azünger, ajisüaka ibaji ajanga shisaliok anguba nung tetsükdaktsü magütsütsüla; lokti ka aintsü atema shisaliok ajanga kanga tongtibang shilem agir, ta ashi.
“Schools aser college-i taküm nung terenlok alitsü atema nü nem shisatsü agütsür. Shisaliok ya pei kija atema masü saka lokti rangben atema südaktsütsüla. Nagaland nung kaketshir ajak melungsentsü nung iba tangatetba alitsüla,” ta paisa ashi.
“Shisaliok inyakyim melenshitsü nüngdaker. Tanü lima nung mapa mangur ka süra graduate kija agi kecha masütsü. Anungji lenirtemi state atema bilema nüburtem nem mapa agütsütsü aser tashi agütsütsü asoshi lenmang balala apiteta inyaktsüla,” ta paisa shisem.
Joint Secretary to Governor, George Abraham-i lokti pelaa agizükba o jembi aser Angh kinüngtsü, Kavita Acharya-i ken ka tena liasü.