Raj Bhavan nung ‘August Kranti’ among

Kohima, August 09 (TYO): 75buba Quit India Movement, koba dang ‘August Kranti’ Andolan taka ajar, iba sentong August 09, 2017 nü Raj Bhavan Kohima nung mongogo, ta PRO to Govoner-i tanü sangdong ka ajanga metetdaktsü.
Iba anogomong nung Nagaland aser Arunachal Pradesh Angh, PB Acharya den Raj Bhavan Kohima ketdangsertem aser staff temi linük tebuti, Mahatma Gandhi nem akhüm agüja liasü.
Commissioner & Secretary to Governor, Piyush Goyal, IAS-i, India nung British nunger yimsüsüba anentsü atema takhangba agüja Quit India Movement ya 1942 küm August ita nung tenzüka liasü, ta metetdaktsü.
Paisa, Quit India Movement ya India-i linük nüchiso bushiba nung tongtibang tatalokba ka lir, aser linüki puitotsü nung ajangshiba rongnung tongtibang tatalokba ka lir, koba ajanga 1947 küm August 15 nü India-i nüchiso angu, ta metetdaktsü.
Goyal-isa, India sorkari nisung ajak dang India tashi itta akumtsü, azükarutsü aser communalism, kin telemsa aser kiralongra makai yangertettsü atema tenangzükba agiang ta ajungshiogo, ta metetdaktsü.