Raj Bhavan temi ozüng alema inyaker : Omar Abdullah

Srinagar, December 18 (Agencies) : Arunachal Pradesh nung yimten tsütsü mangatettep adoka aliba mapang ka nung taoba Jammu & Kashmir chief minister, Omar Abdullah-i Raj Bhavan tim mesüi amshiba inyakyim anosa lir ta ashi.
“Ozüngi melaba ama shimtetba sorkar atsüngdoktsü atema Raj Bhavan temi mapa inyakba yimya mali kümogo ta bilem, saka ibaji odangsa inyaker” ta Abdullah-i Twitter nung metetdaktsü.
Arunachal Pradesh nung yimten maparen kanga dang mamangtetika melenshiba nung ajemdaker Abdullah-i iba onük metetdaktsü.
Yashi Arunachal nung opposition BJP aser Congress nung temulung masürtemi local hotel ka nung Chief Minister Nabam Tuki atsüngdoktsü aser pa melena Congress MLA ka shimtsü atema senden ka agi.
Abdullah ya National Conference nung working president lir aser paisa ashiba agi, 1984 küm Angh-i tim mesüi inyakba ajanga Jammu & Kashmir nung timtem tulu ajuru aser tang iba kasa timtemji Arunachal Pradesh nung ajurur.
“1984 küm Angh ajanga J&K nung takoksa tulu ajuru, iba kasaji Arunachal nung mataloktsü asenoki imladi” ta pai metetdaktsü.
July 2, 1984 nü Angh Jagmohan-i National Conference president aser taoba J&K chief minister Farooq Abdullah mapa nungi anendaktsü.
Abdullah’er kinunger Ghulam Mohammad Shah-i anir pa anema noktakba sülen iba ya atalok aser tatem nung National Conference nung temulung masürtem aser Congress teyari agia Shah chief minister aküm.