Rajan-i pa India-i anir arutsü sorkar dang mepishir

India nung ‘Chotta Rajan’ ta ajasang, Rajendra Sadashiv Nikalje Bali, Indonesia nung Police ketdangsertemi asüngdangyatsü atema anir aoba noksa angur.

New Delhi/Bali, Oct. 29 (Agencies): Tawa Indonesia, Bali nung police-i apusang, India nunger telungpur tetsüdi, Chhota Rajan-i India sorkar dang shidi ka ajanga, pa taküm lendong tulu nung lir anungji pa India linüki anir arung, ta mepishiogo.

Indian Consulate dangi züluba shidi nungji Rajan-i, pa Bali police ket nung liaka pa taküm lendong nungi kümzüka mali, ta ashiba osang tanü osangbenertemi metetdaktsü.

Kasa shidi nung Rajan-i, pa tezüngjang ajanga mapa junga meinyaker aser temang tamajungba akumer, iba den külemi pa apuba mapang nungi chiyungtsü junga machir, ta ashi.

Osang ajanga angzükba agi, Rajan-i telungpur tetsüdi Dawood Ibrahim atema inyaksang Chhota Shakeel-i pa tepsettsü tsübur.

Tang India ketdangsertemi Rajan Indonesia nungi anir arutsü atema nüngdakba kaket mapatem inyakdagi.

Indonesia Police-i Rajan anüktsü atema special commando tem peria tokja lir.

India nung nisung jenti tepsetsang aser küm 20 shi India-i bushia alisang telungpur tetsüdi, Rajan ya October 26 nü Indonesia linük nung pua liasü.

Arishi küm 55 Chotta ya tasoba tenüngbo Rajendra Sadashiv Nikalje lir, aser CBI (Interpol-India)-i mepishiba nung ajemdaker pa apu.

1995 küm Interpol-i Chotta anema red corner notice sangdonga liasü.

2000 küm Dawood Ibrahim’er züngsemtemi pa Bangkok nung aliba hotel ka nung aliba osang lazüka pa tepsettsü merang, ajisüaka pa kilem nungi jenbua liasü.