Rajasthan CM atema Ashok Gehlot; Sachin Pilot-i deputy CM inyaktsü

New Delhi, Luchii (December) 14 (Agencies): Hokolbar nikongtsütsü Rajasthan nung Chief Minister inyaktsü atema Congress-i Ashok Gehlot shimba osang metetdaktsü. Congress-i Sachin Pilot Deputy Chief Minister inyaktsü shim.
Gehlot-i party president Rahul Gandhi aser Rajasthan nung alirtem dang iba maongka agütsüba atema pelaba metetdaktsü.
“Party high command aser Rahul Gandhi nungertemi ni aser kü den yariteper nem Rajasthan nung sorkar ketdangsütsü maongka agütsüba atema kanga pelar. Teinyaktsü aika lir. Onoki tenzüka yutsüba mapa aika taoba sorkari anena lir aser itemji meyipa repranghitsü. State nung Vasundhara Raje dang jashir aika liasü saka onoki nübortem atema inyakba sorkar ka akümtsü” ta Gehlot-i ashi.
Sachin Pilot-ia telemtetba pelashishia agizükba metetdaktsü aser sorkar junga ketdangsütsü nangzük.
“Election asem- Rajasthan, MP aser Chhattisgarh ajanga linük ajungalen anokshiogo. Item elections ajanga teimla samar aliba nisungtem shisabuluba agientsüogo. 2019 nung Lok Sabha elections mapang Congress aser UPA-i takok tajung angutsü ta parnoki joko imlar” ta Pilot-i metetdaktsü.
Rajasthan state assembly election nung Gehlot aser Pilot nati BJP atsüngdoktsüsa mapa tajung inyaktet. 2013 nung Congress-i menden 21 dang ngutet saka takümbo parnoki menden 99 tashi ngua sorkar akümtsü.
Takok anguba sülen Gehlot aser Pilot naprong nem tenüngsang agütsü saka tena posemertemi pei pei lennir nem chief minister menden agüjang ta takhangba agütsütsü tenzük.
Madhya Pradesh nunga Chief Minister atema Kamal Nath aser Jyotiraditya Scindia tsüngda atsütep, saka tatem nung Congress-i Kamal Nath shim.