Rajasthan nung kakettem digitise asür

New Delhi, January 9 (Agencies) : Otsü aser tezüluba kaketem raksaa modaktsütsü nükjidong nung Rajasthan sorkari anogoshia page 10,000 digitise asütsü sentong tenzükogo aser ibaji ajanga yimsüsüba aser alima otsütem mesamadaktsüi kümzüka yutettsü, ta tanü Monglubarnü osang ka ajanga metetdaktsüogo.
Technology amshia nüburtem renloka odaktsütsü asoshi sorkari inyakbaren nungi iba ya teyari tulu ka asütsü.
‘Online records’ aliba ajanga research scholar-tem, state nung administrative department-tem, obendangertem aser nüburtem nem teyari tulu agütsütsü imlar.
Iba dakjji alaka research maparen balala talisa kaketshirtem sayuba tsütsü, kisüjensüba sentongtem, publications & obendangbaren nunga teyari agütsütsü.
PTI osang den jembidang Rajasthan State Archives Bikaner Director, Mahendra Khadgawat-i ashiba agi, “Akhi tejen otsütem zülua akaba yabo raksaaa aotsü akok anungji tarutsü putu asoshi bilema tang item ya rizünga ayutsü nüngdaker.”
Tang Rajasthan State Archive nung princely states 22 indang ‘administrative & historical records’ crore 30-40 dak tema lir. Item rongnung jagi scholars, general public, government & judiciary atema nüngdak ta bilemba kaket (documents) crore 3-4 shi ‘digitisation’ atema shimteta lir.
Taoba küm ishika tsüngda crore ka shi ‘digitise’ süogo aser maneni tang anogoshia page 10,000 südagi, ta kasa osang ajanga metetdaktsüogo.