Rajasthan nung Zika tashidak agi atonger 22 jungogo

New Delhi, Mongputeni/October 9 (Agencies): Nisung tenet agi kümtetba high level central committee ka Jaipur, Rajasthan-i yokogo, kong merla agi belenshiba, Zika virus disease (ZVD) nisung 22 dak keta aliba putetogo.
Tentonü, Indian Council of Medical Research (ICMR) surveillance system ajanga putetba sülen Union health ministry-i Zika tashidak agi kongshir ali parnok 22 aliba osang jangjatsüogo.
“Iba tashidak azüoktsü asoshi state sorkar nem teyari agütsütsü atema nisung tenet agi kümtetba high level Central team ka Jaipur-i yokogo. Iba tensa ya Union minister of health jenjang nung health, secretary-i anogoshia asadangdar,” ta Union health minister, JP Nadda-i sangdong ka ajanga metetdaktsü.
Center team yagi Mongputeni/Oct 5 nü nungi tenzüka Rajasthan nung tensa asadanga tashidak azüoktsü merangdar.
“Ozü team-i tensa kanga junga asadangdar aser tashidak prokshia aoba nokdangtsü asoshi takok tashi inyakdar. Iba tesem nung tanur bener aliba tetsürtem den kanga kümdanga asadangdar. Tang tashi nungbo kecha shisabulutsü mali,” ta health ministry ketdangser kati ashi.
Directorate General of Health Services (DGHS) lenisüba kübok technical experts tem anaben tashi ajurutepa, parnok renemshia alitsü aser tashidak dak sendakba nung telangzüba agütsütsü asoshi sensaksemogo.
“Tanü tashi nung laboratory nung tendangba sülen nisung 22 dak iba tashidak keta aliba putetogo. Tensa maneni asadanga alitsü atema National Centre for Disease Control (NCDC) nung Control Room ka lapokogo. Iba tashidak agi tonger alitsü ta temulung melemi bilemba nisungtem ajak tesem telongtet ka nung dang lir aser iba tesem nung aliba merla dak nungi samples agizüka tendangogo. Viral Research aser Diagnostic Laboratory tem nem testing kits talila agütsüogo,’ ta kasa sangdong ajanga metetdaktsü.
Iba tesem nung merla azüoktsü atema jenjang tapet agi inyakdar.
Zika virus disease ya linük 86 tashi nung putetogo. Zika virus disease indang symptoms ya dengue nunger amala viral infections tem den kasa lir, kong tashidak agi atongertem tekolak menür, teküp nung komo adoker, conjunctivitis, malaise aser temang nung tetsü aser teloktep ayanger.

You must be logged in to post a comment Login