Rajasthan school kakettem nung Nehru otsü mali

New Delhi, May 08 (Agencies): Rajasthan school tem nung class 8 pur kaketshirtemi social science textbook nung Jawaharlal Nehru-i inyakba mapa tajungtem indang mazüngtsü, kechiyong India nung mezüng Ato kilonser inyaksang Nehru indang otsütem iba kaket nungi intokogo.
Rajasthan Board of Secondary Education (mesüra Ajmer Board) den affiliate süa aliba school tem revised textbooks chapter ana nung Nehru otsü intokogo, aser item kaketji class 8 pur taruba academic session nungi amshitsü.
Tang item kaketji dokan nung maangur, ajisüaka iba osangji Rajasthan State Textbook Board indang website nung inoktsüogo.
Iba kaket nung tenüng tasen ka züngoka alibaji linük nüjiso atema rarar, Hemu Kalani lir. Iba kaket nung Mahatma Gandhi, Veer Sawarkar, Bhagat Singh, Bal Gangadhar Tilak, Subhas Chandra Bose nungerbo densema lir, ajisüaka Freedom Movement chapter aser India After Independence naprong nung Nehru tenüng tetshia mali.
Udaipur nung amenoka aliba State Institute of Education Research and Training (SIERT)-i textbooks aika revise süa liasü.
Iba osang angashia Congress-i state sorkari aitsüogo. Taoba mapang Rajasthan chief minister, Ashok Gehlot-i, “Iba ya Rajasthan sorkari inyakba taaktsü mapa ka lir. RSS-i India puti otsü nung jenjang tajung ka mengutet, ajisüaka tang BJP sorkari puti otsü nungi Nehru-i inyakbatem agiener, nüburtemi parnok dang lesson ka sayutsü,” ta ashi.