Rajasthan sorkari tatishitsü tajung sayur: Amit

Jaipur, December 13 (Agencies): Rajasthan Chief minister Vasundhara Raje-i aniba BJP sorkar küm ana ajungba anogomung nung Jaipur nung lokti senden tulu ka nung jembidang BJP National Tir, Amit Shah-i, Rajasthan sorkarji tatishitsü tajung sorkar ka lir, ta ashi.
Raje’er sorkar tenüngsanga BJP tongti Amit Shah-i, yangi yimsüsüba ya tatishitsü tajung ka lir aser Raje-i Narendra Modi’er sorkar sentongtem yimtsüngtem nung junga benoka inyakdar, ta ashi.
Shah-i, “Make in India, Skill India, Digital India, Swachh Bharat Mission aser tanga mapatongtem; Chief minister Raje-i item mapatongtem yimtsüngtem nung benokogo aser tatishitsü tajung sayuogo,” ta ashi.
Shah-isa, tamalen-a Raje leniba nung BJP-i sorkar kümogo, saka iba mapang nungjibo balaka liasü (Centre nung BJP tashi maliasü), ta ashi.
“Tangbo state aser Centre naprongla nung BJP tashi nung lir. Iba nungyagi Raje-i tajangzük aika takok ngua agitetogo,” ta pai ashi.
Paisa, Congress-i state nung terenlok mali ta asüba nungji kuli mali ta ashi.
“Tesüiba küm ana tsüngda Rajasthan state nung inyakba mapatem aser project tem sangdongbaji Congress Party-i küm 60 sorkar tashi nung alidang inyakba dang nungia timba,” ta paisa ashi.
“State nung mapa tajung inyakba atema ni chief minister Raje aser state Tir, Ashok Parnami naprongla nem tenüngsang agütsür. Iba Team Rajasthan ya ajanga ano state temaba jenjang kati ajungkettsü, ta ni tamang akar,” ta paisa shisem.