Rajdhani Express nung yipten sü tajung angutsü

New Delhi, January 3 (Agencies) : Railways nung yipten sü aser pillow sepbangba sü temesüng amshiba melena NIFT-i purapitetba yipden sütem amshitsü.
“Train nung yipten sü temesüng amshiba melena sentsü aika aliba yipten sütem amshitsü. Kobi melii yipten sü tasentemji Rajdhani trains nung amshi tenzüktsü” ta Railway Ministry nung tongti ketdangser kati ashi.
Teshimtet train kar nung yipten sü melenshitsü atema NIFT nem mapa lemzükja liasü. Train nung sü agütsübatem rongnung bedsheet 2, pillow ka, kombol ka aser hand towel ka lir. Tan sentong tasenba nung hand towel dak alaka sü ajakji sentsü tapu balala keta aliba amshitsü, ta ketdangserisa ashi.
“NIFT-i onok dang sü tapu balala sayu aser item rongnungi onoki sentsü tapu ana shimtetogo,” ta paisa shisem.
Indian Railways-i anogo shia AC nung senzür nem bedrolls lakh 3 shi agütsür. Tang yipten sü tasen agütsüba ajanga Railways-i tang endokba sen dang nungi shilem 30 shi kati talila endoktsü.
Railways-i agütsüba yipten sü nung teshinem menener mesüra temang asoshi majung mesüra temenen ta sa nisungtemi shiyonga arur. Iba onük nung ajemdaker Railways-i iba mapa inyaktsü apitet.