Rajinikanth-i TN nung yimtenren party tasen ka tentettsüa akok

Chennai, February 11 (Agencies): Film star nüngtugu, Rajinikanth-i kobi melii Tamil Nadu nung pa indang yimtenren party ka tentettsüa akok; tang iba state nung yimtenren tashi toktepba ajanga mepetmesü adoka lir.
Osang tejangja kar nung ajemdaker India Today TV osang ajanga ashiba agi, RSS lenir, S Gurumurthy-i arishi küm 66 tain, Rajinikanth dang pa indang party ka tentet nung ajungtsü ta shiogo.
Tamil Nadu nung Rajinikath ya tsüngrem ama züngshir, aser pa nem yimtenren party tasen ka tentetdaktsüba ajanga BJP-i state nung parnok amenoktsü sentong yanglur, ta osang angazüker.
Ajisüaka tesülenbo pai chief minister menden atema tokteptsüa akok, ta kasa osang ajanga ashi.
Ano külen Bollywood superstar aser par tembar, Amitabh Bachchan-ibo pa dang yimtenren nung majemoktsüla ta shiogo, ta osang angazüker.
1980s mapang Amitabh-i yimtenren nung mapang tatsüka ajemoka liasü, iba mapang nungji pai Congress ticket nungi Uttar Pradesh nung Allahabad Lok Sabha constituency nung toktepa takok ngua liasü.
Amitabh aser Rajinikanth nati Hum, Giraftaar aser Andha Kanoon film tem nung külemi shilem agia lir.