Rajiv Gandhi asoba anogomung 71 buba nung linüki pa bilemetet

New Delhi, August 20, 2015: Taoba mapang Ato kilonser Rajiv Gandhi asoba anogomung 71 buba nung Congress Tir Sonia Gandhi, tatong Tir Rahul Gandhi aser Priyanka Gandhi kinüngbu Robert Vadra nungeri asür nem akhüm agütsüba noksa nung angur.

New Delhi, August 20 (Agencies): Taoba mapang linük Ato kilonser Rajiv Gandhi sor küm 71 ajungba anogomung nung Tir Pranab Mukherjee densema lenirtem aser linüki asür bilemteta akhüm agütsüogo.

Tanü Rajiv Gandhi Samadhi nung Tir Mukherjee, tatong Tir Hamid Ansari, Rajiv Gandhi kinüngtsü aser Congress Tir Sonia Gandhi aser taoba Ato kilonser Manmohan Singh nungeri naro tokja akhüm agütsüogo.

Iba dak alia Sonia’er jabaso aser Congress tatong Tir Rahul Gandhi, jala Priyanka Gandhi aser la kinüngbu Robert Vadra nungeria akhüm agütsüogo.

Twitter osang ka ajanga Ato kilonser Narendra Modi-i, “Taoba mapang India Ato kilonser Rajiv Gandhi asoba anogomung nung ni akhüm agütsüogo,” ta ashi.

Samadhi nung asür nem akhüm agütsür rongnungsa Congress lenirtem- PC Chacko, Sajjan Kumar aser Delhi Pradesh Congress Committee (DPCC) Tir Ajay Maken nungera densema liasü.

Iba sentong nung tekülem ken atem aser National Students Union of India (NSUI) züngsemtem aser Congress student wing nung züngsemtema noklang aika dena liasü.

Linük nung Information & communication technology asüngsashisang Rajiv Gandhi ya 1944 küm August 20, 1944 nü aso aser 1984 küm nungi 1989 küm tashi India Ato kilonser inyak.

Pa May 21, 1991 nü Tamil Nadu, Sriperumbudur nung election nüboyim sentong ka nung adenba mapang LTTE-i bomb agi pa pokseta südaktsü.