Rajiv Gandhi Khel Ratna Award atema Sania Mirza tenüng benoker

New Delhi, August 01 (Agencies): 2015 Rajiv Gandhi Khel Ratna sempet agütsütsü atema Wimbledon tetsür doubles champion, Sania Mirza tenüng benokba osang ka India Sports Ministry-i tanü Honibar nü metetdaktsüogo.
“2015 Wimbledon tetsür doubles shilem indang takok marok agizükla, Mirza nem Khel Ratna sempet agütsütsü asoshi Sports Minister, Sarbanada Sonowal-i onük benokogo. Ajisüaka, la nem iba sempet agütsütsü mesüra magütsütsü telemtetbabo Awards Committee-i ang agitsü,” ta Sports Secretary, Ajit Sharan-i osang jangjashitsü.
Mirza-i la den külemi asayala, Switzerland tsür Martina Hingis den külemi lungjemer 2015 Wimbledon tetsür doubles shilem indang takok marok agizük aser ibaji la asoshi mezüngbuba doubles shilem indang Grand Slam takok marok liasü.
Iba takokbaji anguba jakdang, Mirza aser Hingis nati tetsür doubles asayar tarensen nung mezüngbuba jenjang ngutetba osanga bushitetogo.
“All India Tennis Association (AITA) nungi menor ang osang angu saka minister-sangi kasaji agizüka Mirza tenüng Awards Committee den benok,” ta Sharan-i ashi.
Taoba mapang mixed doubles shilem indang Grand Slam takok marok 3 tashi agizükla, Mirza den külemi, Squash asayar, Deepika Pallikal aser discus aoner, Vikas Gowda na tenünga temaba sempet agütsütsü asoshi benoka lir.