Rajiv Gandhi tepsetertem chioktsü TN sorkar dak tashi mali: SC

New Delhi, Dec. 02 (Agencies): Taoba mapang Ato kilonser, Rajiv Gandhi tepsetba ken o nung aija alir nisung tenet akumli piyong tepouktak ayutsü obendang agütsüba sülen tepouktak lir, aser tanü Bodhbar nü Supreme Court (SC)-i, Tamil Nadu sorkari iba obendang nungji asetshitsü makok, ta shiogo.

Chief Justice H L Dattu-i aniba constitution Bench kati, Central agency kati bushisüngdangba ken otem nung Centre tiyongi aittsü tim, aser parnok tepouktak nungi chioktsü telemtetba magidang TN sorkari Centre den tama tongtepa jembitsüla, ta ashi.

“State-i agiba ken otem nungbo, ken o tanaben angadanga chioktsü atema state dak tashi lir,” ta SC-i ashi.

Tamalen Tamil Nadu sorkari parnok obendang agishia chioktsü lemteta liasü, ajisüaka SC-i ibaji magizük.

State sorkar telemtetba anema Centre-i Supreme Court dang, Rajiv Gandhi tepsetba ken oji Central Bureau of Investigation (CBI)-i bushisüngdanga ken o kaa liasü, anungji aibelenertem chioktsü mesüra ken o jembishitsü melatsü tashiji Centre sorkar dak lir, ta benoka liasü.

Iba Constitution bench nung tanga obendangertemji Justice Fakkir Mohamed Ibrahim Kalifulla, Justice Pinaki Chandra Ghose, Justice Abhay Manohar Sapre aser Justice Uday Umesh Lalit nunger liasü.

TN sorkaribo V Sriharan (Murugan), A G Perarivalan (Arivu) aser T Suthendraraja (Santhan) nunger ken o tanaben angadanger chioktsü lemteter liasü. Ano chioktsü atema benoka alir rongnung Jayakumar, Nalini aser Ravichandran nunger liasü.

Rajiv tepsetertem chioktsü atema tamalen Tamil Nadu sorkari lemteta liasü saka 2014 February 20 nü Supreme Court-i ibaji nokdang.

1991 küm bomb ajanga Rajiv Gandhi tepseter parnok tenet küm 20 dak tema tepouktak lia arudar.

Ano Nalini Sriharan bo tasüba agi merenshitsü liasü, ajisüaka Rajiv kinüngtsü aser Congress Party Tir, Sonia Gandhi tiyongi aita lai taochi sayuba ajanga tasüba temerenshi magütsü.