Rajjat Barjatya asüpila sentong nung Salman manenteti ajeb

August 01, 2016 : Mumbai nung Rajshri Media nung MD aser CEO Rajjat Barjatya den asüpila sentong agiba mapang Bollywood actor Salman Khan ajeba noksa nung angur.

August 31, 2016 : Salman Khan dak kanga tara yimya keta lir, ajisüaka pa den kanga anasatepa medemer Rajshri Media nung CEO, asür Rajjat Barjatya atema sarasademtsüba sentong nisung ajaki Salman Khan ajeba angu.
Pai asür Rajjat adianu aser pa medemer Sooraj Barjatya dak azüloker manenteti ajeb. Pai nüktzü aluba anendaktsütsü kanga merang saka manendaktsütet.
Salman Khan-i akhi mapang nungbo camera jakdang yimya tajungtiba sayutsü meranger ajisüaka tan bo pa ajeb dang noksa tangoba ajak pai kecha hau ta maliasü. Pa Rajshri Production kübok Maine Pyaar Kiya film ajanga ajaki meteta aküm. Iba den külemi Sooraj Barjatya aser asür Rajjat na den Salman tesentaktep tashi aitba ajaki meteta lir.
Salman-i shilem agiba Maine Pyar Kiya, Hum Aapke Hain Koun, Hum Saath Saath Hain aser Prem Ratan Dhan Paayo film tem ya Rajshri-i produce asüba film tem lir.
Rajjat Barjatya ya Hokolbarnü (July 29, 2016) asü. Pa cancer agi shiranga lia iba lima nungi pila.
Mumbai nung July 31, 2016 nü pa atema sarasadem sentong akadang nüngtugu nisungtem aika arua aden. Salman Khan den Prem Ratan Dhan Payo film nung külemi shilem agila Sonam Kapoor, film yanglur Subhai Ghai, actress Raveena Tandon, actress Tara Sharma, actor Satish Shah aser ano celebtiry aika iba sentong nung aden.
Sultan film nung tongti shilem agisang, Salman-i pa temulung shirangba manenteti pa tejak nüktzü agi yimbang. Pai producer Rajjat asüba angashili, “Kü adianu na süngjema anisüngzükang,” ta Tweet asü.
Rajjat ya anogo ishika Jaslok Hospital nung yaria lia asü.