Rajkummar Rao-i Nargis Fakhri den külemi shilem agitsü

Mumbai, August 29 (Agencies): Bollywood actor, Rajkummar Rao-i actress, Nargis Fakhri den külemi Hollywood production “5 Weddings” nung shilem agitsü, aser iba film ya Namrata Singh Gujral-i direct asütsü.
Osangbenertem den jembidang Rajkummar-i, “Los Angeles nung aliba production house kati kü den tongtepratepa jembiogo. Ni film otsü aser maparen ajunga jagi mulung asür. Iba sülen ni director den jembia iba project nung aden. Iba ya feature film ka lir aser iba film nung Nargis künati külemi shilem agitsü,” ta ashi.
Tang Rajkummar ya “Bareily Ki Barfi” film mazüngi tangokdar, aser ibaji tembangba sülen Chandigarh nung aser Los Angeles na nung “5 Weddings” tangok tenzüktsü.
“Chandigarh aser Los Angeles na nung iba film tangoktsü. Nargis Fakhri ji jangratemtsü tetsür ka lir. Ni la ano majuru saka lai ‘Madras Cafe’ film nung shilem agiba ni ngüogo,” ta Rajkummar-i ashi.
“Lai US nung intetba India tsür shilem agitsü, ni la den külemi inyaksemtsü yongyar,” ta National Award angusangisa ashi.