Rajnath aser Macron nati linük tesendaktep atema jembi

New Delhi/Paris, October 08 (Agencies): France nung Rafale tayimtsü agizüktsü atema tang Union Defence Minister, Rajnath Singh France-i oa lir, aser Mongolbarnü pai France Tir, Emmanuel Macron ajurua India-France defence tesendaktep atema jembiogo.
France yimtiba, Paris nung aliba Elysee Palace nung senden amendang Macron-i Singh dang France ya India atema tongtibang partner ka lir, ta ashi.
India defence secretary, Ajay Kumar-i, “Asenok France den lenla aika nung tesendaktep kanga junga lir aser terenlok lir. Tanübo linük ana tsüngda defence tesendaktep tajungba akümer,” ta ashi.
Singh-i France Armed Forces Minister, Florence Parly-a ajurua senden amen aser iba senden nung France Tir atema Defence Advisor, Admiral Bernard Rogel-a dena liasü.
Singh-isa Merignac jila nung Rafale manufacturer Dassault Aviation semdangba sülen Indian Air Force (IAF)-i mezüngbuba Rafale tayimtsü agizükba sentong nung aden.
Dussehra benjung den külemi Air Force Day – IAF anogomong nüngtem nung Singh-i twitter ajanga, “87buba IAF anogo nung IAF sepaitem aser parnok kibongtem den ni salem lemsateper,” ta metetdaktsü.
France-i Singh miena aoertem rongnung Vinay Mohan Kawatra, India’s ambassador to France, Armed Forces nungi Air Marshall Harjit Singh Arora, Voice Chief of Air Staff; Vice Admiral G Ashok Kumar, Vice Chief of Naval Staff aser Lt Gen. Rajeev Sabherwal, Vice Chief of Army Staff nunger densema lir.
Rafale tayimtsü agizükba sülen Singh-i Rafale tayimtsü tendanga mendangtsü iba sülen sobaliba inyakyim ama tayimtsü jakdang naricol ka jaksatsü.
Rafale agizükba sentong nung jembidang Rajnath Singh-i, iba ya putiotsü akümtsüsa lir aser iba ya ajanga India aser France na asalentong tsütsü tesendaktep tajungba akümtsü, ta ashi.
Rafale tayimtsü agütsüba sentong nung French minister of Armed Forces Florence Parly-a aden, ta Defence ministry nungi otongdar kati metetdaktsü.
India-i France dang nungi sen crore 59,000 agi Rafale tayimtsü 36 alitsü atema 2016 küm September ita nung tezüngzüktep agia liasü. Tan hopta iba tayimtsü agütsüba sülen mezüngbuba tayimtsü pezüji sangküm May ita India-i bener arutsü. Tayimtsü 36 pronglaji 2022 küm tashi nungbo India ket atongtsü imlar.
Rafale tayimtsü ya mezüng 2004 küm French Navy-i amshi aser 2006 küm French Air Force-i amshia liasü. Afghanistan, Libya, Mali, Iraq aser Syria nung raraba mapang nung iba tayimtsü kanga junga amshia liasü.
Rafale tayimtsü ajanga India nunger Medium Multi-role Combat Aircraft fleet jenjang tajungba akümtsü.
Mezüngbuba Rafale tayimtsü number ji RB 001 asütsü; RB ojangji tayimtsü alitsü atema tezüngzüktep agiba nung tongtibang shilem agir taoba Air Chief Marshal Rakesh Bhadauria tenüng nungi agizükba lir.
Bodhbarnü Minister-i French defence industry enterprises balala nungi CEOs den senden ka amentsü aser iba mapang nung Singh-i ‘Make in India’ nung ajemdaker sangküm February 5-8 anogotem Lucknow nung ayongzükba DefExpo nung shilem agitsü atema parnok jaoktsü, ta kasa osang ajanga metetdaktsü.