Rajnath-i arrtsülen aliba state pongu dang Rohingya nunger nokdangtsü tuyu

Kolkata, December 07 (Agencies): Brihostibarnü Union home minister, Rajnath Singh-i India anüdoklen Bangladesh den arrtsüa aliba state pongu dang Rohingya nunger Indo-Bangla arrtsü adena maittsüsa nokdangang, ta tuyu.
Tanü Kolkata nung West Bengal, Assam, Mizoram, Meghalaya aser Tripura state tem nungi Chief Minister tem aser Home minister tem den senden ka amendang Rajnath-i, ozüng alema linük telungi aitba nokdangtsü atema item states nung border protection grid amenoktsü, ta metetdaktsü.
“Rohingya nunger aser ozüng alema aitertem nokdangtsü atema state sorkartemi kanga yakyaka inyaktsüla,” ta Union minister-i ashi.
Home minister-isa telungpur/kiralongrartem den tesendaktep alir bendangertem anema inyaktsü, kechiyong iba ya linük security atema lendong lir, ta ashi.
“Centre aser state sorkartem longjemer inyak nungang kiralongraratem aser alia inyakertem nokdangtettsü,” ta Singh-i ashi.
India-Bangladesh arrtsü adena Rohingya nunger aser Bangladeshi nunger ozüng alema India telungi aitba ya linük atema tebilemtsü onük tulu ka lir.
Ketdangsertem sangdong ka ajanga ashiba agi, tang India tesem balala nung Rohingya nunger 36,000 shi jenoka lidar.
Taoba hopta BSF Director General, K K Sharma-i ashiba agi, taküm küm tenzüker October 31 tashi nung BSF sepaitemi India-Bangladesh arrtsü nung Rohingya Muslim nunger 87 puogo aser parnok 76 bo Bangladesh-i meyipa yokogo.